От ыйыгар уматыгы оҥорон таһаарыы кээмэйэ үрдүөн сөп

Бэрэсидьиэн бэлиэтээбитинэн, ньиэби оҥорон таһаарар бөдөҥ собуоттар кыахтара билигин муҥутуур таһымҥа туһанылла сылдьар, оттон от ыйыгар уматыгы оҥорон таһаарыы бэс ыйынааҕар үрдүк буолуохтаах.

Дойдуга бензин саппааһа 1,7 мөлүйүөн туоннаҕа тэҥнэстэ — бу былырыыҥҥы таһымҥа тэҥнэһэ сыһар. Ол да буоллар ырыынакка кыһалҕалар хаалаллар: саппараапкаларга уочараттар үөскүүллэр, ардыгар наадалаах уматык мааркатын булбакка хаалыы тахсар.

Путин балаһыанньаны туруктаах оҥорор дьаһаллары ыларга сорудахтаата, чуолаан, уматыкка уонна экономика өттүттэн сиэрдээх сыананы тутуһарга. Кини тыа хаһаайыстыбатын комплексын хааччыйыыга ураты болҕомтотун уурда: манна кэмигэр тиэрдии графигын тутуһуу үүнүүнү уонна аска-үөлгэ куттал суох буолуутун хааччыйыыга быһаарар суолталаах.