Оскуола звоногун оннугар сэбиэскэй кэм саҕанааҕы ырыалар тыаһыахтара

“Звонок оннугар мелодия” бырайыак Арассыыйа бары регионнарыгар РФ Үөрэхтээһинин министиэристибэтин бирикээһинэн киирэр. Уруок саҕаланыытын уонна бүтүүтүн биллэрэр звонок аны Сэбиэскэй кэм саҕанааҕы уонна билиҥҥи кэм патриотическай матыыптарынан доҕуһуолланыаҕа.

Балаҕан ыйыгар Арассыыйа бары оскуолаларыгар үөрэх-билии, учуутал, доҕордоһуу, саҥа арыйыылар тустарынан биллэр ырыалары истиэхтэрэ. Ол курдук, оҕолорбут Михаил Пляцковскай тылыгар, Владимир Шаинскай матыыбыгар «Дважды два – четыре» ырыаны, Денис Майданов “Песня первых”, Константин Томилин, “Домисолька” музыкальнай театр, Бүтүн Арассыыйатааҕы “Хор Первых” ырыаларын истиэхтэрэ.

Маҥнайгы кылааска киирээччилэргэ Юрий Энтин тылыгар, Владимир Шаинскай матыыбыгар “Первоклашка”, Михаил Пляцковскай тылыгар, Владимир Шаинскай матыыбыгар “Учат в школе”  ырыалар тыаһыахтара.

Ырыалары үксүн Виктор Попов аатынан Бүтүн Арассыыйатааҕы Улахан оҕо хора толорор.