Оскуола Улуу Кыайыы үбүлүөйүн көрсөр

Кыайыы 80 сылын көрсө биһиги оскуолабытыгар хас биирдии кылааска Ийэ дойдуга бэриниилээх буолууга аналлаах араас тэрээһиннэр ыытылыннылар.

Ол курдук, бастатан туран, төрөппүттэр уонна оҕолор сокуоннай бэрэстэбиитэллэрэ уоттаах сэриини ааспыт аймахтарын туһунан иһитиннэриини булан киэҥник сырдаталларын, информацияны дириҥэтэн үөрэтэллэрин туһугар «Кыайыы 80 сылыгар оҕолорго тугу кэпсиэххэ сөбүй?» диэн тиэмэҕэ төрөппүт мунньахтарын ыыппыппыт. Тохсунньу 27 күнүгэр Ленинград блокадатын 81-с сылыгар аналлаах линейка буолан ааспыта. Бу күн үөрэнээччилэр Ленинград блокадатын кэмигэр сырдык тыыннара быстыбыт дьону кэриэстээбиттэрэ.

Улахан кылаас уолаттара Сайсары күөлгэ «Ильмень иhин кыргыһыы» диэн  театрализованнай дьүһүйүүгэ кыттыбыттара биир бэлиэ түгэн буолар. «Патриотическай ырыаны уонна хаамыыны көрүү» бырайыак чэрчитинэн байыаннай куонкурус, спортивнай, баһаарынай-прикладной көрүҥнэргэ күрэхтэһиилэр  ыытыллыбыттара. ОБЖ (Олоххо куттал суох буолуутун төрдө уонна Арассыыйаны көмүскээччи) учуутала П.А. Никифоров  салайааччылаах эр дьон түмсүүтэ үрдүкү кылаас уолаттарыгар «Аармыйаҕа биир күн» диэн үгэс буолбут тэрээһини ыыппыттара.

Аҕа дойду Улуу сэриитин тиэмэтэ оскуола араас тэрээһиннэригэр сырдатылынна: кылаас чаастарыгар, уруһуй куонкурустарыгар, сэрии уонна тыыл бэтэрээннэригэр көмө аахсыйатыгар, «Патриот» байыаннай- спортивнай оонньууга, оскуола музейыгар экскурсияларга, «Самсоновскай ааҕыылар» научнай-практическай конференцияҕа уо.д.а. Бу тэрээһиннэр быйылгы үөрэх дьыла түмүктэниэр диэри салҕаныахтара.

Ыам ыйын 5 күнүгэр «Самсоновтар оскуолаларын ситимнэрин бастыҥ учуутала» диэн күрэх үөрүүлээх сабыллыытыгар оскуолабытыгар Кыайыы Знамята кэллэ. Ыам ыйын 7 күнүгэр оскуола «Үрүҥ туруйалар», «Өйдөбүнньүк чүмэчитэ» уонна «Өлбөт үйэлээх полк» аахсыйалары тэрийиэҕэ. Ыам ыйын 17 күнүгэр Александр Самсонов-Кыайыы ырыаһытын репертуарыгар олоҕуран, «Хордар күрэстэрэ» ыытыллыаҕа. Ону тэҥэ «Кыайыы түннүктэрэ» диэн Бүтүн Арассыыйатааҕы аахсыйаҕа кыттабыт, оскуола үөрэнээччилэрин үгэс буолбут турслеттарын тэрийэбит.

Хатастааҕы үлэ кэлэктииптэрин икки ардыларыгар ыытыллыбыт «Хас биирдиибит өйдөбүлэ» диэн бэстибээлгэ Гран-при хаһаайына буолбуппут, көрүҥҥэ барытыгар кэриэтэ кыайбыппыт.

Быйылгы биир улахан ситиһиибит – оскуолабыт өрөспүүбүлүкэ 96 агрооскуолатыттан талыллан, Арассыыйа Наукатын Академиятын иһинэн тыа хаһаайыстыбатын табаарын оҥорон таһаарыыны уонна агроүөрэхтээһини көҕүлүүр соҕотох тирэх кыһата буолуута.

Ол курдук, оскуола тэрээһиннэрэ үүнэр көлүөнэни иитии дьоһун сорҕото буолаллар, ийэ дойдуга бэриниилээх буолууга көмөлөрө улахан. Биһиги дьоруойдарбытын өйдүүбүт-саныыбыт, дьоллоох олоҕу уһансыбыт хас биирдии бэтэрээни чиэстиибит!

Күндү бэтэрээннэр, Улуу Кыайыы күнүнэн эһигини ис сүрэхпиттэн эҕэрдэлиибин, кытаанах доруобуйаны, дьолу-соргуну баҕарабын, чугас дьоҥҥут тапталларыгар угуттанан уһуннук олоруҥ диэн алгыс тылбын тиэрдэбин! Аймах-билэ дьоҥҥут эһигини ситиһиилэринэн үөрдэ-көтүтэ турдуннар, куруук өйөбүл-тирэх буоллуннар, таптыы, көмүскүү, харыстыы сырыттыннар!