Оскуола тутуутугар ирдэнэр харчы хомуллубут

Судургутук быһаардахха, сорох дьиэ тутар тэрилтэлэр (застройщик) тутуу ыытар көҥүлү (РНС) кыайан ылбакка олороллор. Ол тутуу хаамыытын бытаардар. Оттон РНС ылбакка олорор төрүөттэрэ – тутуохтаах эбийиэктэрэ кэлим былаанынан буолбакка, биирдиилээн түстэнэр («точечнай») тутуу быһыытынан ыытыллыахтаахтара.

Быһата, үөрэх эбийиэктэринэн хааччыллыбатах оройуоннарга олорор дьиэни тутууга РНС биэрбэттэр.

РНС – хапытаалынай тутууну ыытыы сокуоҥҥа сөп түбэһэрин, градостроительнай нуормаҕа, ирдэбилгэ эппиэттиирин кэрэһилиир официальнай докумуон.

Ити курдук, Дьокуускай куоракка оскуола тиийбэт кыһалҕатын быһаарар уонна тутуу хаамыытын тэтимирдэр сыалтан ааспыт сылтан «инфраструктараҕа хомуур» диэн 1 кв/м иһин 3000 солк. кээмэйдээх хомуур киирбитэ. Бүгүҥҥү күҥҥэ мээрийэ маннык хомуур туһунан 12 тутааччыны кытта уопсайа 682 мөл. солк. кээмэйдээх сөбүлэҥи түһэрсэн олорор. Бу харчы 203-с түөлбэҕэ үлэлиир Глобальнай үөрэхтээһин оскуолатыгар (ЦГО) эбии куорпуһу тутарга тиийэр диэн буолбут. Эбийиэк бырайыак-смета докумуона судаарыстыбаннай эспэртиисэни аастаҕына, үлэ саҕаланаары турар.

Инфраструктураҕа хомуур биирдиилээн тутуу (точечная застройка) быһыытынан ыытыллар эбийиэктэн эрэ ылыллар. Оттон территорияны кэлимник тутуу чэрчитинэн, эрдэттэн социальнай эбийиэктэрдээх гына тутуллар бырайыактар РНС-ы холкутук ылаллар.

Инфраструктаҕа хомуур ньыматынан киирбит үбү бастатан туран ЦГО эбии куорпуһу тутууга туһаҕа таһаарар туһунан быһаарыы төрүөтүнэн чуолаан бу оскуолаҕа билигин нуорматтан түөрт төгүл элбэх оҕо үөрэнэрэ буолбута.