Оскуола тутуута ыам ыйыттан саҕаланыах тустаах

Билигин Петровскай аатынан уулусса 6 нүөмэригэр үлэлии турар, 2024 сыллаахха куорат 10 бастыҥ үлэлээх оскуолатын иһигэр киирбит, 17-с нүөмэрдээх  оскуола  2002 сыллаахха үлэҕэ киирбитэ. Күн-дьыл, эчи, түргэнэ!  Субу соторутааҕыта курдук этэ, ону баара бэлиэр 24 сыл ааһа охсубут. Бу тутуу бырайыак быһыытынан, биир симиэнэҕэ  350 оҕо үөрэнэригэр сөптөөх. Оттон күн бүгүн  күннэтэ 1400 үөрэнээччи кэлэн, манна билиини-көрүүнү сомсон барар. Алта сыллааҕы чахчыны көрдөххө, олох да  1500 үөрэнээччи баара.

Кэрэхсэбиллээҕэ, Дьокуускай куорат маастар-былааныгар олоҕуран, бу оскуолаҕа эмиэ эбии тас тутуу дьэндэйиэҕэ. Бу буолан ааспыт Быһа эпииргэ Ил Дархан ол эбии тутуу ыам ыйыттан саҕаланыах тустааҕын иһитиннэрдэ.

Тутуу бырайыактаах-симиэтэлээх докумуонун оҥоруу түмүктүүр түһүмэҕэр киирбит. Ол гынан баран, билиҥҥитэ тутуу техническэй усулуобуйатыгар боппуруостар баалларын, ол эрээри ол  уталыппакка быһаарыллан,  оскуола тутуута кэмигэр саҕаланыахтааҕын  эппит.  

Улуустартан куоракка көһөн киирии билигин да тохтообот. Дьокуускай нэһилиэнньэтэ эбиллэр. Онон  иккис симиэнэнэн үөрэнии кыһалҕата суох буоларын курдук куоракка киэҥ-куоҥ, аныгы ирдэбилгэ эппиэттиир саҥа оскуолалар, эбии тутуулар эбиллэллэрэ  -- билигин кэм тирээн турар сытыы боппуруостарыттан биирдэстэрэ... Ааспыкка суруллубутун курдук, былырыын СПЛ саҥа эбии таас тутуута үлэҕэ киирбитэ. Аҕыйах хонуктааҕыта 20-с оскуола бастакы сыбаайатын түһэрии бэлиэ тэрээһинэ буолбута. Оттон аны,  этэҥҥэ буоллаҕына, ыам ыйыттан аны 17-с нүөмэрдээх оскуолаҕа тутуу үлэтэ саҕаланар эбит.