Оскуола формата. Сыана наһаа ыараата

«Об образовании в Российской Федерации» федеральнай сокуоҥҥа олоҕуран, хас биирдии үөрэх тэрилтэтэ оскуолаҕа кэтиллэр форма өҥүн, моһуонун уонна бу таҥаһы кэтии быраабылатын олохтуур бырааптаах.

Дьокуускай Үөрэххэ управлениетыгар кэпсээбиттэринэн, оскуола формата бастатан туран оҕолорго табыгастаах, көстүүтэ тупсаҕай, оҕолорго социальнай, баай-дуол, итэҕэл эйгэтигэр тэҥ буолууну олохтуур сыаллаах. Маны тэҥэ биир тэҥ форма оскуолаҕа истиҥ үөрэх эйгэтин тэрийэргэ, үөрэнээччилэрэ түмсүүлээх буолалларыгар тирэх бириэхтээх.

Быйылгыттан Дьокуускай үгүс оскуолаларыгар форма киирдэ. Урут да форма баар эбит буоллаҕына, сорох оскуолаларга быраабылалары чопчулаан, ирдэбиллэри олохтоон биэрдилэр, сорохторго олох да формаларын уларытан, атыны ылыннылар.

Холобур, Дьокуускай куорат 21 №-дээх оскуолатыгар урут кыргыттарга, хараҥа халлаан күөх эрэ өҥнөөх буоллун, былаачыйа эбэтэр сарапаан, дьууппа уонна сэлиэччик; уолаттарга бүрүүкэни кытта сэлиэччик диэн эбит буоллаҕына, быйылгыттан ирдэбиллэрэ кытааппыт: кыргыттарга – маҥан булууһаны кытта халлаан күөҕэ хараҥата дьууппа, сэлиэччик, палаццо бүрүүкэ, ону кытта кыһыл килиэккэ бабочка-хаалтыс; уолаттарга маҥан эрэ ырбаахыны кытта халлаан күөҕэ хараҥата бүрүүкэ, сэлиэччик, хара атлас хаалтыс киирбиттэр. Бэлиэтээн эттэххэ, үөрэнээччилэр формаларын былырыын төрөппүттэр ырытыһан, мунньахтаан, онтон куоластаан талбыттар. Куоластааһыҥҥа улахан кылаас оҕолоро эмиэ кыттыспыттар. Онон быйылгыттан бэйэлэрэ талбыт формаларын өрөспүүбүлүкэҕэ биир биллэр маҕаһыынтан атыылаһыахтаахтар. Быйылгыттан өссө оскуола эмблемэтин оҥорон бэлэмнээбиттэр.

Ол эрэн бу форма сыанатыттан сорох төрөппүт соһуйбут. Ол курдук, орто сүһүөх кылаас үөрэнээччитин, 44-46 размердаах таҥаһы кэтэр кыыс дьууппата – 3590 солк., палаццо бүрүүкэ – 3490 солк., сэлиэччик – 2990 солк., бабочка-хаалтыс 690 солк. атыыланаллар эбит. Инньэ гынан төрөппүт  биир оҕону ортотунан 10 760 солкуобайга таҥыннарабыт. Аны таҥас кээмэйэ улааттаҕын аайы сыаната 100-200 солк. эбиллэн иһэр.

Эмиэ бу "монополист” маҕаһыыҥҥа уол оҕо сэлиэччигэ 2390-3790,00 солк. сыаналаах, бүрүүкэтэ – 2550-3490 солк..

Үгүс төрөппүттэр өлө-сүтэ ирдэнэр форманы атыылаһаллар. Оттон сорохтор дьүһүнэ эрэ майгыннаатын диэн арыый удамыр сыаналаах кытай ырыынагыттан атыылаһаллар. Ырыынакка да сыана наһаа чэпчээбэтэх: сэлиэччик ортотунан – 2300-2500 солк., дьууппа уонна бүрүүкэ 2 500 солк. саҕаланар сыаналаахтар. Маркетплейстарга от ыйыгар оскуола таҥаһын биир көрүҥүн 1000-1200 солк. саҕалаан сакаастыахха сөп эбит буоллаҕына, билигин күһүөрү сыана барыта өрө барар, икки бүк үрдээн турар.