«Оскуолаҕа киинэ саалата» бырайыак ыччат сэҥээриитин ылар

Саха сирин үс оскуолатыгар «Оскуолаҕа киинэ саалата» пилотнай бырайыак саҕаланна. «Экстра Синема» Арассыыйа технологиятын көмөтүнэн кылгас кэм иһигэр ыраах сытар нэһилиэнньэлээх пууннары киинэ саалаларынан хааччыйыахха сөп. Ону сэргэ өрөспүүбүлүкэ нэһилиэктэригэр уонна дьоҕус куораттарыгар оскуола оҕолоро дойду аудиовизуальнай нэһилиэстибэтин кытта билсэллэригэр кыах бэриллэр. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

«Экстра Синема» хампаанньа генеральнай дириэктэрэ Петр Чиряев кэпсээбитинэн, Арассыыйа үөрэххэ министиэристибэтин кытта бырайыактара Дьокуускай куорат Саха политехническай лиссиэйигэр уонна Чаппанда (Ньурба улууһа) уонна Таас Үрэх (Мииринэй оройуона) оскуолаларыгар саҕаламмыт.

«Сыл бүтүөр диэри оскуолаларга «Экстра Синема» технологияны туһаныы практическай уопутун кэтээн көрүөхпүт, ол кэннэ бүтүн дойду таһымыгар таһаарар былааннаахпыт», – диэтэ Петр Чиряев.

Саха политехническай лиссиэй 7-с кылаастарыгар «Рядовой Чээрин» киинэни көрдөрдүлэр. Бу күн киинэ режиссера, сценариһа уонна артыыһа Дмитрий Кольцов ыалдьыттаата. Саха суруйааччыта, Аҕа дойду Улуу сэриитин кыттыылааҕа Тимофей Сметанин сэһэнигэр олоҕуран уһуллубут байыаннай драманы үөрэнээччилэр уонна учууталлар бэркэ сэргээн, биир тыынынан көрдүлэр. Киинэ кэнниттэн оҕолор режиссеру кытта сэһэргэстилэр, элбэх ыйытыыны биэрдилэр. Дмитрий Кольцов Тимофей Сметанин сэһэнин хайаан да ааҕалларыгар сүбэлээтэ. Көрсүһүү бүтүүтэ оҕолор автограф ылан, үөрэн-көтөн тарҕастылар.

«Ыччат – биһиги саамай сүрүн көрөөччүбүт, билигин кини болҕомтотун тардар туһугар күрэстэһии барар. Ол иһин саҥа технологиялары уонна кэпсээһин сонун ньымаларын туһанан, кинилэри интэриэһиргэтэр бырайыактары оҥоруох тустаахпыт. Ис хоһоонугар олус болҕомтолоохтук сыһыаннаһыахтаахпыт. Биһиги оҕо аймах сэҥээриитин ылар иһин Голливуду кытта күрэстэһэрбитин өйдүөхпүтүн наада, онуоха дьиҥнээх дьоруойдар тимир көстүүм кэтэн баран халлааҥҥа харбаһар үрдүк дьиэлэр быыстарыгар көтө сылдьыбаттарын, биһиги Ийэ дойдубутун көмүскүү сылдьар ыаллыы олорор уолаттарбыт буолалларын көрдөрүөх тустаахпыт. Өскөтүн ити сыаннастары үүнэр көлүөнэбитигэр тириэртэхпитинэ, биһиги бары кыайыахпыт»,  – диэн санаатын үллэһиннэ Дмитрий Кольцов.

Айта, 7-с  кылаас үөрэнээччитэ: «Киинэни урут ийэлээх аҕабын кытта көрбүтүм. Ол иһин бүгүн кэпсээн кэбиһиэм диэн нэһиилэ туттуннум, тоҕо диэтэххэ сорохтор саҥа көрөллөр эбит. Уолаттар сөбүлээбиттэрин бэлиэтээтим. Режиссёр миэхэ баҕа санааларын суруйда уонна автограф биэрдэ. Биһиэхэ оскуолабытыгар бэйэтинэн кэлбитэ олус үчүгэй! Киинэҕэ барыта дьиҥнээх курдук көстөр: дэлби тэптэриилэр, сэрии сэбэ, саллааттар таҥастара. Сэһэни саха суруйааччыта суруйбут эбит. Титргэ олус элбэх аат баарын, киинэни элбэх киһи оҥорон таһаарарын көрөн соһуйдум. Бүгүн режиссёр Берлин туһунан киинэ салгыыта уһуллуо диэтэ, ону көрүөхпүн баҕарабын».

СПЛ дириэктэрэ Надежда Тимофеева бу нэдиэлэҕэ оскуолаҕа Михаил Лукачевскай «Триумф» киинэтин көрдөрүөхтээхтэрин кэпсээтэ. Онно ыалдьыттартан биирдэстэринэн бу киинэҕэ оонньообут лиссиэй үөрэнээччитэ буолуоҕа.

«Оҕолор быһаччы оскуолаҕа учууталлары уонна оҥорон таһаарааччылары кытта киинэ көрөн уонна ырытыһан, араас тиэмэҕэ кэпсэтэн үөрдүбүт. Бииргэ көрүү улахан иитэр-үөрэтэр суолталаах, биллэн турар, учууталларга уонна үөрэнээччилэргэ олус табыгастаах – билигин үчүгэй киинэни быһаччы оскуолаҕа бииргэ көрөр кыахтанныбыт. Ол кэнниттэн үөрэнээччилэртэн санааларын истэбит, киинэни төһө сөбүлээбиттэрин, туох түмүккэ кэлбиттэрин өйдүүбүт», – диэн санаатын үллэһиннэ Надежда Тимофеева.

Санатан эттэххэ, «Оскуолаҕа киинэ саалата» пилотнай бырайыак дойду Бэрэсидьиэнэ Владимир Путин сорудаҕынан олоххо киирэр. Ол чэрчитинэн быйыл сэтинньи ыйга  Саха сирин үс оскуолатыгар «Экстра Синема» баазатыгар киинэни көрдөрүү саҕаланна. Оттон өрөспүүбүлүкэ үрдүнэн «Экстра Синема» ситим 77 киинэ саалата үлэлии турар, онно 118 тыһыынча киһи хабылынна.

Хаартыскалар:
СӨ Ил Дарханын уонна Бырабыыталыстыбатын пресс-сулууспата