Орулуур отут сыл устата ситэриллибэтэх тутуу

Ленин пр., 55/1 харааран турар бу дьиэни куорат эрэ буолуо дуо, өрөспүүбүлүкэ олохтоохторо үчүгэйдик билэллэр. Этэргэ дылы, бүтүн биир көлүөнэ «хараҕын ааллылар».

58 уонна 20 кыбартыыралардаах икки дьоҕус таас дьиэ... сыччах ааспыт үйэ 90-с сылларыттан силис-мутук тардаллар. Оччолорго «Просвещение» дьиэ тутар кооператив бэйэтин пайщиктарыгар... баара суоҕа биир сылынан Дьоллоох Дьокуускай килбэйэр киинигэр кыбартыыра хаһаайына буолуоххут диэн эрэннэрэр. Хомойуох иһин, кооператив иһигэр эн-мин дэһии уонна салалта уларыйыытын түмүгэр ааттарын «Строим вместе» ЖСПК диэн уларыталлар. Сотору кэминэн букатын даҕаны моҥкуруут бараллар. Бу туһунан «Эхо столицы» өссө 2010 сыллаахха сиһилии суруйан турар.

Онтон ыла элбэх хаар ууллан, ардах түһэн аастар даҕаны, балаһыанньа оннуттан хамсаабатын кэриэтэ. 

Тутуу министиэристибэтэ: «Мэрия билэр»

СӨ тутуу министиэристибэтигэр «Эхо столицы» иһитиннэрбиттэринэн, «Строим вместе» ЖСПК тутууну ыытарга көҥүл бэриллибэтэх, 2018 сыллаахха эбийиэк көҥүлэ суох тутуулар реестрдэригэр киирбит.

2007-2013 сс. пайщиктар тутааччы моҥкуруут баран эрэрин истэн, суут быһаарыытыгар сигэнэн, тутулла илик дьиэҕэ кыбартыыралары бас билээччилэр бырааптарын оҥорторбуттар. 2012-2014 сс. судаарыстыба өттүттэн хоромньуларын харчынан оһорунарга аккаас ылбыттар.

Министиэристибэҕэ быһаарбыттарынан, эбийиэккэ сыһыаннаан долевой тутуу дуогабардара оҥоһуллубатахтар, ол иһигэр Росреестр уорганнарыгар судаарыстыбаннай регистрация оҥоһуллубатах. Онон гражданнар долевой тутуу кыттыылаахтарынан ааҕыллыбаттар, гражданнар бырааптарын чөлүгэр түһэриини көрөр федеральнай сокуон кинилэргэ дьайбат.

Ол эрээри ааспыт уонча сылы быһа албыннаппыт гражданнар эбийиэги салгыы тутары туруорсаллар. Онуоха сокуон хоруйа биир – ситэриллибэтэх тутууну бас билээччилэр эппиэтинэһи бэйэлэрэ сүгэллэр.

2023 сыллаахха СӨ тутуу министиэристибэтэ үөскээбит балаһыанньаҕа сырдык тыктарар сыалтан, «План мероприятий по восстановлению жилищных прав граждан» диэн бырайыагы оҥорон көрбүт – Ирбэт тоҥу чинчийэр инстутут оройуонугар уонна Ленин пр., 55/1 (урут «Строим вместе» ЖСК бэриллибит сирдэр) баар сирдэри туһаҕа таһаарарга. Быһата, бу сирдэри инвесторга биэрэн баран, тутууну тиһэҕэр тиэртэрэргэ. Хомойуох иһин, ол кэмҥэ дуогабардар болдьохторо номнуо ааспытынан, 2024 сыллаахха СӨ Арбитражнай суута министиэристибэ сайабылыанньатыгар аккаастаабыт. Суут быһаарыытыгар сир учаастагын хаһаайына – Дьокуускай куорат Олохтоох дьаһалтатын санаата учуоттаммыт.

Куорат дьаһалтата 2025 сыл от ыйын 23 күнүгэр Ленин пр., 55/1 аадырыска турар хапытаалынай тутуу эбийиэгин тэхиньиичэскэй көрүүнү тэрийэр. Чинчийии сыалынан эбийиэк сыбаайаларын уонна конструкцияларын туругун көрүү буолар. Ол түмүгүнэн акт толоруллар: Тутууну салгыы ыытар нэһилиэнньэҕэ кутталы суоһуур.

Мэрия: «Ханнык да механизм сөп түбэспэт»

2020 сыллаахха Олохтоох дьаһалта 20 кыбартыыралаах дьиэ хаһаайыттарын уонна «Строим вместе» ЖСПК суукка биэрэн, эбийиэги көҥүлэ суох тутуунан ааҕарга көрдөһөр. Суут аккаастыыр. Эмиэ бу сылга Олохтоох дьаһалта итинник үҥсүүнү 58 кыбартыыралаах дьиэҕэ сыһыаннаан биэрэр.

Куораты тутууга уонна архитектураҕа департамеҥҥа иһитиннэрбиттэринэн, эбийиэктэр иккиэн көҥүлэ суох тутуунан ааҕылла иликтэр, бүгүҥҥү күҥҥэ «ситэтэ суох тутуу» статустаахтар.

Бэлиэтээн этэллэринэн, маннык ситэтэ суох тутуу боппуруоһун федеральнай сокуонунан быһаарыы суох. 

Бас билээччилэр: «Өрөмүөнү бүтэрэ охсон, киириэхпитин эрэ баҕарабыт»

Уулусса кытыытыгар турар 58 кыбартыыралаах дьиэ уруккутун курдук кураанах.

Оттон иккис линияҕа турар 20 кыбартыыралаах дьиэ куорпустарын таһыгар хамсааһын барар. Бэлиэтээн эттэххэ, бу куорпустар тус-туһунан блоктартан тураллар. Хас биирдии секция туһунан киирэр ааннаах. Туһунан коммуникациялаах. Бастакы куорпус танхаустарын бас билээччилэр биригээдэлэри наймылаһан, тутууну салҕаан эрэллэр.

«Эхо столицы» кэрэспэдьиэнэ кинилэртэн биирдэстэрин кытта кэпсэттэ: 

«Бу кыбартыыра 7 сыллааҕыта аймахтарбыттан тиксибитэ. Онтон ыла докумуоннарбытын бэрээдэктиибит, өрөмүөн оҥостобут. Уот, гаас киллэртэрдибит. Былаас өттүттэн көмө суох. Билигин өрөммүөммүтүн ситэрэн, дьиэҕэ киирэр туһунан акт ылан, олорорбутун эрэ күүтэбит. Аны күһүҥҥэ диэри бүтэриэхпитин баҕарабыт».

Тутуу биригээдэтин бэрэстэбиитэлэ быһаарбытынан, кинилэр харатын эрэ өрөмүөннүүр эбиттэр.

Тутуу министиэристибэтин санаата халбаҥнаабат: 20 кыбартыыралаах дьиэҕэ тутуу-монтаж үлэтэ көҥүлэ суох ыытыллар. Сири бас билиигэ докумуон суох. Бу РФ КоАП 9.5 ыст. 1 ч. сөп түбэһэр административнай буруйунан ааҕыллар.