Орто үөрэх кыһаларыгар докумуоннары Доҕордоһуу болуоссатыгар тутуохтара

Атырдьах ыйын 7 күнүгэр сарсыарда 10:00 чаастан киэһээ 17:00 чааска диэри Доҕордоһуу болуоссатыгар орто анал үөрэх кыһалара бары биир сиргэ мустан абитуриеннартан докумуоннарын тутуохтара.

Саха сиригэр баар үгүс колледжтар уонна техникумнар ханнык идэлэргэ бэлэмнииллэрин билиһиннэриэхтэрэ, киирии ирдэбиллэрин туһунан кэпсиэхтэрэ.

Сайабылыанньа биэрэргэ докумуоннаргытын (пааспар, аттестат) уонна 3×4 хаарысткаҕытын эрэ илдьэ кэлэҕит.

Докумуоннары тутуу таһынан, идэлэрин чопчу тала илик оҕолорго консультациялар, маастар-кылаастар, үөрэх кыһаларын материальнай-техническай базаларын билиһиннэрэр презентациялар ыытыллыахтара. Бэлиэтээн эттэххэ, маннык аахсыйа иккис сылын ыытыллар.

Быйыл өрөспүүбүлүкэ үрдүнэн орто үөрэххэ 54 кыһа докумуоннары тутар, ол иһигэр 50 орто анал үөрэх уонна 4 үрдүк үөрэх кыһалара бааллар. Барыта холбоон 6864 бүддьүөттэн үбүлэнэр миэстэ тыырыллыбыт.

Колледжтарга 19 саҥа идэ хайысхата киирбит. Холобур, Арктикатааҕы хотугу норуоттар колледжтарыгар сүөһүнү иитэр исписэлиистэри бэлэмниэхтэрэ. Оттон Нерюнгри медицинскэй колледжыгар стоматология салаата аһыллыбыт, Дьокуускайдааҕы сибээс техникумугар компьютернай оонньуулары оҥорор уонна оҥоһуу өйү кытта үлэлиир хайысха баар буолбут. Тутуу уонна геология хайысхатыгар информационнай моделирование, ууга сэрэхтээх буолуу, маһы таҥастааһын курдук ураты хайысхалар киирбиттэр.

Орто үөрэх кыһаларыгар абитуреннартан 13 тыһыынчаттан тахса сайабылыанньа киирбит. Саамай үрдүк куонкурустаах “сестринское дело” идэҕэ 600 сайабылыанньаны туттарбыттар. Ону тэҥэ начаалынай кылаас учууталыгар, экономика, оҥоһуу өй уонна автомеханика идэлэригэр элбэх киһи туттарсар эбит.

Колледжтарга саамай үрдүк куонкурустааҕынан инники күөҥҥэ Дьокуускайдааҕы медицина колледжа сылдьар – 2578. Медколледж кэнниттэн Педагогическай колледж, Сибээс уонна информационнай технология колледжа, Тыа хаһаайыстыбатын техникума уонна Технологическай сервис техникума сылдьаллар.