Орто үөрэх кыһалара бары биир сиргэ докумуон тутуохтара

Сарсын, атырдьах ыйын 7 күнүгэр сарсыарда 10:00 чаастан киэһээ 17:00 чааска диэри Доҕордоһуу болуоссатыгар орто анал үөрэх кыһалара бары биир сиргэ мустан абитуриеннартан докумуоннарын тутуохтара.

Саха сирин 15 улууһуттан 32  колледж уонна техникум (ол иһигэр хоту улуустарга баар үөрэх кыһалара) ханнык идэлэргэ бэлэмнииллэрин билиһиннэриэхтэрэ, киирии ирдэбиллэрин туһунан кэпсиэхтэрэ. Үөрэх кыһатын бэрэстэбиитэллэрин кытта сирэй көрсөн кэпсэтэр түгэни мүччү тутумаҥ!

Сайабылыанньа биэрэргэ докумуоннаргытын (пааспар, уонна аттестат) уонна 3×4 хаарысткаҕытын эрэ илдьэ кэлэҕит.

Докумуоннары тутуу таһынан, идэлэрин чопчу тала илик оҕолорго консультациялар, маастар-кылаастар, үөрэх кыһаларын материальнай-техническай базаларын билиһиннэрэр презентациялар ыытыллыахтара. Бэлиэтээн эттэххэ, маннык аахсыйа иккис сылын ыытыллар.