Оробуочай бөлөх тэриллибит

Уотунан сылытынар (электроотопление) улуустар, чуолаан, Сунтаар уонна Ньурба улууһун олохтоохторо бу кэнники уот иһин төлөбүрдэрэ эмискэ өрө көтөн тахсан, улаханнык айманнылар. Дэлэҕэ, өрүү да холку, киэҥ көҕүстээҕинэн биллэр нэһилиэнньэ араас таһым үрдүк сололоохторго сурук суруйарга сананыахтара дуо!

Ол сурук киэҥ эйгэҕэ тарҕанаатын кытта бу кыһалҕаны бастаан Ил Түмэн таһымыгар кэпсэппиттэрэ иһиллибитэ. Оттон тохсунньу 23 күнүгэр Ил Дархан уонна Бырабыыталыстыба дьаһалтатын пресс-сулууспата анал Оробуочай бөлөх тэриллибитин туһунан иһитиннэриитэ кэллэ. 

Бу туһунан социальнай ситимҥэ буолбут быһа эпииргэ СӨ Сыана бэлиитикэтигэр судаарыстыбаннай кэмитиэтин бэрэссэдээтэлэ Николай Бочков: “Оннук ырытан, анааран көрүү түмүгүнэн, уотунан сылытыы чэпчэтиилээх тарыыбыгар хапсарга олохтоммут кээмэйи (порог льготируемого тарифа) үрдэтэн биэрэргэ биитэр нэһилиэнньэ кэккэ араҥатыгар тус аадырыстаммыт субсидияны көрөн, өйөбүл эбии ньыматын олохтуурга  этии оҥоһуллуо”, – диэтэ.  

Оробуочай бөлөххө муниципалитеттар, былаас уорганнарын уонна Тарыып, Субсидия ааҕыныстыбаларын, «ДЭК» ПАУо бэрэстэбиитэллэрэ, эспиэрдэр уонна хааччыйар тэрилтэлэр салайааччылара киирбиттэр.

 
*Билигин нэһилиэнньэ кэккэ араҥатыгар көрүллэр дифференцированнай тарыып тиһигэ үлэлиир уонна анал чэпчэтиилэр бааллар.

*Ону таһынан ыал бүддьүөтүгэр охсуулаах буолбатын наадатыгар тус аадырыстаах өйөбүл механизмнара олохтоммуттара. Холобур, өрөспүүбүлүкэ олохтооҕо дьиэ-уот хомунаалынай өҥө (ЖКУ) төлөбүрүгэр (ол иһигэр уотунан сылытыы төлөбүрэ эмиэ киирсэр) ыытар харчыта дьиэ кэргэн биир дьиэҕэ олорор дьонун кытта аахсар ыйдааҕы уопсай дохуоттарын 15 % -тан үрдүк буолла да, субсидияны туруорсар бырааптаах.

Манна даҕатан эттэххэ, ити этиллэр кээмэй (15%), Арассыыйа атын эрэгийиэннэригэр биһиэниттэн үрдүк,  ортотунан, 22 % тэҥнэһэр.

*Аны, ыал уопсай дохуота тииһинэн олоруу алын кээмэйигэр тиийбэт түгэнигэр, ити этиллэр 15 %-ҥа  өссө эбии намтатар кээписийиэн туттуллан, көмө ананыыта судургутуйар.

*Нэһилиэнньэ үп-харчы өттүнэн тутахсыйбыт араҥатын өйүүр туһуттан итини сэргэ эбии чэпчэтиилээх усулуобуйа олохтоммута. Ол курдук:
– Соҕотоҕун эбэтэр туһунан олорор үлэлээбэт биэнсийэлээхтэргэ, ону таһынан 5 уонна онтон элбэх сокуоннай саастарын туола илик оҕолоох ыалларга ЖКУ ороскуота (допустимая норма) дохуот, бэл, 0 да бырыһыана буолан хаалыан сөп. Ол аата, быыкаа дохуоттаах ыал хомунаалынай өҥөҕө төлүүр үптэрэ төһө да кыратын иһин, субсидияны анатыахтарын сөп.  

– Ону таһынан үс уонна онтон элбэх оҕолоох ыалларга ЖКУ өҥөтүгэр төлүүр үптэрин 30 %-нын саҕа кээмэйдээх кэмпэнсээссийэ көрүллэр. Бу көрүҥ өйөбүл ыал төһө-хачча дохуоттааҕыттан тутулуга суох 12 ыйга ананар.