Орнитология обсерваториятын саҥа эбийиэктэрэ тутулуннулар
Бу күннэргэ орнитология обсерваториятын бүтэһик эбийиэктэрэ “Куолума-Чаппанда” эрэгийиэннээҕи ураты харыстанар сиргэ, Алдан өрүс уҥа кытылыгар тутуллан үлэҕэ киирдилэр.
“Полет стерха” бырайыагы олоххо киллэрии иккис түһүмэҕэр көтөрдөрү биһилэхтиир ыстаансыйа, көтөр миграциятын кэтииргэ смотровой былаһаакка тутулуннулар. Тутуу сүрүн партнердар “Нордголд” хампаанньа уонна “Доброта Севера” пуонда өйөбүллэринэн ыытылынна. Тутуутун “Прогресс Проект” оҥордо.
СӨ Биологическай ресурсалар дириэксийэлэрин дириэктэрин солбуйааччы Саргылана Михайлова кэпсээбитинэн, “Орто Алдан” ыстаансыйа атырдьах ыйыттан саҥа дьиэҕэ үлэлиэҕэ. Орнитологтар уонна чинчийээччилэр Кытай көтөрдөрү биһилэхтиир киинин кытта ыкса үлэлэһэллэр, быйыл саас Кытайга баран үөрэнэн кэлбиттэр. «Куолума-Чаппанда» резерват кыталык Восточноазиатскай-Австралазийскай маршрутун биир сүрүн чааһа буолар эбит.
2025 сыллаахха Томпо оройуонугар Охотскай Перевозка обсерватория киинэ, үлэһиттэри хоннорор дьиэ тутуллубуттара.
2026 сылга Саха сиригэр “Полет стерха” орнитология бырайыагын иккис түһүмэҕэ киирэр. Бырайыак сүрүн сыала-соруга Кыһыл кинигэҕэ киирбит ытык көтөр көрүҥүн сөргүтүүгэ, харыстааһыҥҥа туһуланар.
Сонуннар
Ордук ааҕаллар
