Орджоникидзе болуоссатын фонтанын өрөмүөнэ түмүктэннэ

Атырдьах ыйын 31 күнүгэр Орджоникидзе болуоссатын фонтанын хапытаалынай өрөмүөнүн хамыыһыйа тутан, бэдэрээччит фонтаны үлэлэтэн көрдө. Онон фонтан аны сайыҥҥа диэри холбоммот. «Кытыйа» конструкция уотун эмиэ эһиил холбуохтара.

Дьокуускай куораттааҕы ОДьХХ уонна энергетикаҕа департамент начаалынньыга Иван Негнюров иһитиннэрбитинэн, Орджоникидзе болуоссатын фонтана 20-тэн тахса сыл биирдэ да хапытаалынай өрөмүөнү ааспакка үлэлээн кэлбит. Онон быйыл сайын балтараа ый устата турбаларын, электрикэтин, носуоһун барытын саҥардыбыттар.
Эһиил аны «Киин» киинэ тыйаатырын кэннинээҕи Тыыл бэтэрээннэрин уонна сэрии оҕолорун скверин фонтана өрөмүөннэниэҕэ.
2019 сыллаахха тутуллубут киин куорат бастакы «куранаах» фонтана эмиэ носуостара алдьанан, хапытаалынай өрөмүөҥҥэ наадыйар. 2019 сыллаахха бу фонтаны «Водоканал» тэрилтэ оҥорон, куоракка биэрэн турар. Онон бу фонтан эмиэ эһиил сайын оҥоһуллуоҕа.
Санатар буоллахха, Орджоникидзе болуоссатын фонтана 2002 сыллаахха үлэҕэ киирбитэ. Быйыл манна «ПТСК» МУП хапытаалынай өрөмүөнү оҥордо, диэн Олохтоох дьаһалта пресс-сулууспата иһитиннэрэр.