Оптуобустары атыылаһыыга 80 мөлүйүөн солкуобай кэриҥэ көрүллүбүт
Дьокуускайга анаан куорат кытыыларыгар сылдьар 55 уонна куораттар икки ардыларыгар сүүрэр 10 оптуобуһу атыылаһарга 80 мөлүйүөн солкуобай кэриҥэ көрүллүбүт. Ити туһунан ахсынньы 20 күнүгэр ыытыллыбыт планеркаҕа олохтоох дьаһалта тырааныспарга уонна суол хаһаайыстыбатыгар Управлениетын начаалынньыга Василий Амбросов иһитиннэрбит.
Кини эппитинэн, ЯПАК уонна «Сбербанк-лизинг» лизинговай дуогабар түһэрсэн, 2022 сыл сааһыгар 55 саҥа оптуобуһу ылары былааннаабыттар.
«Бу иннинэ лизиҥҥэ бастакы усунуоһу киллэриигэ субсидия бэриллээһинигэр Саха сирин тырааныспарга Министиэристибэтэ ыыппыт сүүмэрдиир куонкуруһугар ЯПАК кыайыылааҕынан тахсыбыта. Куорат кытыыларыгар сылдьар 55 уонна куораттар икки ардыларыгар сүүрэр 10 оптуобуһу атыылаһарга судаарыстыбаннай бүддьүөттэн барыта 78 мөл. солк. көрүлүннэ», — диэбит Василий Амбросов.
Итини таһынан, бу нэдиэлэҕэ чааһынай оптуобустаахтар «Сбербанк-лизинг» тэрилтэни кытта саҥа тиэхиньикэни ылар сөбүлэҥи түһэрсиэхтээхтэр.
Ити курдук, 2022 сылга Саха АССР 100 сылыгар, киин куорат оптуобуһун паарката 100 тиэхиньиэкэнэн саҥардыллыаҕа.