Оптуобустарга номохтору сэһэргиир аудиогидтар үлэлиэхтэрэ

Дьокуускай куорат олохтоохторо оптуобуһунан айанныы таарыйа былыргы номохтору уонна суоппардар кэпсээннэри истэр кыахтаныахтара.
«СУОЛ (ПУТЬ)» социокултуурунай бырайыагы «Үлэ кыбартаала» кластер резиденнэрэ айар холбоһуктары кытта ВЭФ.РФ уонна Дьокуускай куорат Олохтоох дьаһалтатын көҕүлээһиннэринэн үлэлэттилэр, диэн «ВЭБ.РФ» бырайыак пресс-сулууспата иһитиннэрэр. «СУОЛ (ПУТЬ)» маны таһынан оптуобус тохтобулларыгар, быыстапкаларга, кинигэлэргэ эдэр худуоһунньуктар иллюстрацияларын билиһиннэриэҕэ.

Бырайыак үс хайысхалаах: «Туймаада ноиохторо», «Якутск глазами водителей» нууччалыы уонна сахалыы тылынан аудиогидтар уонна эдэр худуоһунньуктар номохторго олоҕуран айбыт үлэлэрэ. «Туймаада номохторо» хайысха салайааччыта, «Саха тыла-400» уопсастыбаннай түмсүү чилиэнэ Алла Ноговицына бэлиэтээбитинэн, өссө 1930–1940-с сылларга фольклористар Сэһэн Боло, Г.В. Ксенофонтов, о.д.а. кырдьаҕастартан Дьокуускай куорат туһунан үһүйээннэри, номохтору суруйан хаалларбыттар. «Биһиги бу сэдэх кэллиэксийэҕэ олоҕуран 30 номоҕу бэлэмнээтибит — Туймаада хочотугар саха олохсуйуутун, Хоро, Омоҕой, Тыгын, Эллэй тустарынан, музейга баар удаҕан, Чочур Мыраан, Шергин шахтатын уо.д.а. Маныаха төлөпүөн камератын QR-кодка таҕайыаҥ эрэ кэрэх — номоҕу истибитинэн бараҕын», – диэтэ кини. 

Номохтор сахалыы, нууччалыы тиэкистэринэн Гуманитарнай чинчийии института дьарыктаммыт. Оттон ааҕыыны Саха тыйаатырын артыыстара Айаал Аммосов, Иннокентий Луковцев, урбаанныт, ырыаһыт Анатолий Бурнашев, норуодунай суруйааччы Наталья Михалёва-Сайа уо.д.а. курдук биллиилээх дьоҥҥо итэҕэйбиттэр. 
«Якутск глазами водителей» аудиогид – оптуобуска суоппардаабыт дьон дьиҥнээх историялара. «Биһиги пассажирдар оптуобус уруулугар робот буолбакка, саныыр санаалаах, таптыыр сүрэхтээх тыыннаах киһи олорорун өйдөтүөхпүтүн баҕарабыт. Кинилэр кэпсээннэринэн куорат хайдах уларыйан испитин кэтээн көрүөххэ сөп», – диэн кэпсиир «Голос внутри» бырайыак салайааччыта Юрий Донской. Ол туһунан Ил Дархан уонна Бырабыыталыстыба пресс-сулууспата иһитиннэрэр.