Оптуобус суоппардара дьиэ куортамыгар чэпчэтиинэн туһаныахтара

Дьокуускай куорат Олохтоох дьаһалтатын көҕүлээһининэн оптуобус суоппардарын «Доступное арендное жилье в ДВО» бырагыраамаҕа киллэриэхтэрэ.

Ол курдук, СӨ тутууга миниистирэ Виктор Романов атын регионнартан уонна өрөспүүбүлүкэ улуустарыттан Дьокуускай куорат оптуобустарыгар суоппарынан үлэлии кэлэр дьон дьиэ куортамыгар чэпчэтиинэн туһаныахтара, холобура, икки хостоох кыбартыыра ыйдааҕы төлөбүрэ 12-14 тыһ. солк. буолуоҕа диэтэ.
Санатар буоллахха, дойду баһылыга Владимир Путин сорудаҕынан саҕаламмыт «Доступное арендное жилье» бырагырааманан ааспыт 2024 сыл кулун тутар ыйыгар Дьокуускай куоракка бастакы 24, миэбэлинэн толору хааччыллыылаах, кыбартыыра бэриллибитэ. 
Өрөспүүбүлүкэ баһылыга Айсен Николаев Ил Түмэҥҥэ Анал этиитигэр үүммүт 2025 сылга маннык үс элбэх кыбартыыралаах дьиэ үлэҕэ киириэхтээҕин туһунан этэр турар: Дьокуускайга – 141 кыбартыыралаах, Нерюнгрига – 192, Алдаҥҥа – 28.
Саха сиригэр 2026 сыл бүтүөр диэри бу бырагырааманан Дьокуускай, Нерюнгри, Алдан уонна Мииринэй куораттарга 850 кыбартыыра тутуллаары турар. Кыбартыыралар анал байыаннай дьайыы кыттыылаахтарыгар, бүддьүөт үлэһиттэригэр, учуонайдарга, эдэр исписэлиистэргэ бэриллиэхтэрэ, диэн иһитиннэрэр Ил Дархан уонна Бырабыыталыстыба пресс-сулууспата.