Оптуобус реформатын хаамыыта
Санатар буоллахха, сэтинньи 18 күнүттэн куорат сорох маршрутнай оптуобустарын схематыгар уларыйыы киирбитэ. Ол курдук, уопсастыбаннай тырааныспары үстүү маршруттан турар лоттарга арааран, куораты барытын хабан, сырыыны-айаны табыгастаах оҥорор сорук бастакы түһүмэҕэ саҕаламмыта.
Уларытыы 8 маршрут сырыытыгар киирбитэ. Итинтэн билиҥҥитэ 5 уонна 7 №-дээх маршруттарга кэккэ ыарахаттар үөскүүллэр, ону кэмигэр быһааран иһэргэ улахан КАВЗ оптуобустары таһаараллар. Сарсыарда уонна киэһэ, дьон ордук элбиир кэмигэр, улахан оптуобустар эбии тахсан көмө буолаллар.
1 №-дээх маршрукка толору ЯПАК МУТ муниципальнай оптуобустара таҕыстылар. Холобур, былырыын 1 №-дээх маршрукка 3-5 эрэ оптуобус тахсан, нэһилиэнньэттэн элбэх үҥсүү киирэрэ. Уларыйыы кэннэ оптуобустар икки ардылара лаппа кыччаата.
Оттон 8 №-дээх маршрут, дьону тиэйээччи эбээһинэһин толорботоҕун иһин, тохтообута. Үөскээбит кыһалҕаны быһаарар туһуттан 16 уонна 1 №-дээх маршруттар суоллара уларыйда. 16 №-дээх маршрут билигин 8 №-дээх оннугар Лонгинов уулуссатынан барар, оттон Өрүс пордун оройуонунан 1 №-дээх маршрут сылдьар. Уоннааҕы уулуссалар атын маршруттарга хапсаллар.
Итини сэргэ быйылгыттан икки урут суох, саҥа маршрут киирдэ – 11 №-дээх уонна 12 №-дээх. Санатар буоллахха, 11 №-дээх маршрут алтынньы 14 күнүттэн үлэтин саҕалаабыта. Пригороднай сэлиэнньэтиттэн сылдьар. Сүрүн сыала – куорат кытыытынааҕы нэһилиэктэр сырыыларын табыгастаах оҥоруу.
12 №-дээх саҥа маршрукка билиҥҥитэ, үҥсүү киирэринээҕэр, сөбүлээбит дьон ахсаана элбии турар. Онон 25 уонна 15 №-дээх маршруттар кыһалҕалара быһаарылынна. 25 №-дээх маршрут бу сыл саҕаланыыта тохсунньуга уонна бу күһүн линияҕа тахсыбатах ыксаллаах түгэннэрэ баара, сыл устата бу хайысханан 5 эрэ тиэхиньикэ сүүрбүтэ. Оттон 15 №-дээх маршрукка 8 массыына сүүрэрэ. Биир эмэ оптуобус алдьанан хааллаҕына, арыттара 40-50 мүнүүтэҕэ, чаастан ордукка да тиийтэлиирэ. Маннык балаһыанньа ордук кыһын үөскүүрэ ыарахан. Ол иһин бу маршруттары иккиэннэрин 12 №-дээх нүөмэрдээх маршрукка холбоотулар, маны тэҥэ 35- уонна 6 №-дээх оптуобустар бу хайысханан таарыйан ааһар буоллулар. Ону кытта саҥа дьоҕус оройуоннарга киирэн ааһаллар – “Звезднай” микрооройуон, Геодезистар уулуссалара уонна Пригороднай сэлиэнньэтэ хабылыннылар.
Санатар буоллахха, 2022 сыллаахха киирбит саҥа 100 №-дээх маршрут көдьүүһэ тута көстүбүтэ.
Саҥа маршруттар тустарынан сиһилии информация Дьаһалта официальнай сайтыгар баар: https://yakutskcity.ru/press-tsentr/novaya-marshrutnaya-set-kak-budut-ezdit-avtobusy-v-gorode-yakutske/
Оптуобус бырайыаһа үрдээбэт
Ол туһунан ахсынньы 17 күнүгэр Дьокуускай куорат баһылыга Евгений Григорьев “Россия 24” ханаалга “Куораты кытта быһа эпиир” биэриигэ иһитиннэрдэ.
Биллэн турар, уматык, саппаас чаас сыаната үрдүү турар кэмигэр бырайыас сыанатын үрдэтэри ирдэһэллэр эрээри, билигин, оптуобус сырыытыгар уларыйыы киирэ турар кэмигэр, сыананы үрдэппэт туһунан Олохтоох дьаһалта өттүттэн маршруттары бас билэр дьону кытта кэпсэтии ыытылынна.
300-900 “тута сибээс” линията уонна “ПРОавтобус” телеграмм-ханаал үлэлээтилэр
Оптуобустар сырыыларыгар ыйытыылары биэрэргэ Суол-тырааныспар сулууспатын управлениетын көҕүлээһининэн “тута сибээс” линията үлэлээтэ.
300-900 нүөмэринэн эрийэн, оптуобус сырыытыгар сыһыаннаах ыйытыылары биэриэххэ сөп: расписаниелара, айаннарын арыта (интервал), тохтобуллар, тарыыптар, төлөбүр ньымалара о.д.а.
Маны тэҥэ араас кыһалҕалаах боппуруостары быһаарсар кыах баар – каартаны сүтэрдэххэ, оптуобуска малы умуннахха о.д.а. Бэлиэтээн эттэххэ, “тута сибээс” линиятын көмөтүнэн номнуо хас да киһи сүппүт малын суһаллык булла. Онон олохтоохтор маннык тута эрийэн тиийэр сулууспа баар буолбутун астыннылар.
"Тута сибээс" линията күн аайы 07:00-21:00 чч. эбиэтэ, өрөбүлэ суох үлэлиир: 300-900
Маны таһынан 300-900 нүөмэринэн оптуобус сырыытын тупсарарга санааҕытын, туох эмэ этиилээххитин, туруорсуугутун этиэххитин сөп.
«Тута сибээс» линиятыгар эрийэн, куорат олохтоохторо ордук туох туһунан ыйыталларый?
Сүрүннээн маршруттарга киирбит уларыйыылары туоһулаһаллар, оптуобус хаһан, хаска хоҥнорун ыйыталлар эбит.
Биллэн турар, үгүс мунаахсыйыы саҥа схемалар тула үөскүүр. 300-900 нүөмэргэ эрийэн ону чуолкайдыыллар. Ону тэҥэ баҕа санааларын хото этэллэр.
Ыксаллаах түгэҥҥэ, холобур, оптуобуска малларын, үтүлүктэрин, төлөпүөннэрин о.д.а. умнан кэбистэхтэринэ эмиэ 300-900 эрийэн, кыһалҕаларын быһаартара охсоллор. Бу күннэргэ сүппүт үтүлүктэн, төлөпүөнтэн саҕалаан, харчылаах кумааһынньыкка, суумкаҕа тиийэ умнуллубут маллар хаһаайыннарыгар төнүннүлэр.
Дьокуускай куорат олохтоох дьаһалтатын Суолга-тырааныспарга сулууспатын телеграмм ханаалыгар суруттарыҥ:
Оптуобустар сырыыларын туһунан кырдьыктаах информация, суһал иһитиннэрии барыта ити ханаалга тахсар.
46 сылаас тохтобул үлэлии турар
Дьокуускай куоракка баар 46 сылаас тохтобулу барытын Дьокуускай куораттааҕы пааркалар уонна уопсастыбаннай туоналар дирекциялара хонтуруоллуур. Оптуобус сылаас тохтобулларын сарсыарда арыйыынан уонна киэһэ хатааһынынан эмиэ бу тэрилтэ дьарыктанар.
Сылаас тохтобуллар сарсыарда 07.00 чааска арыллаллар уонна киэһэ 23.00 чааска хатаналлар.
Сылаас тохтобуллары күлүгээннэр (вандаллар) соруйан алдьаталлара баар суол. Бу күннэргэ Гагарин уокуругар уонна Дьиэ-уот департаменын тохтобулларыгар хоромньуну таһаардылар. Бэлиэтээн эттэххэ, тохтобул аайы кэтээн көрөр видеокамералар үлэлииллэр, полиция буруйдаахтары тута булан, эппиэтинэскэ тардар.
5 уонна 7 №-дээх маршруттары күүһүрдэллэр
Билиҥҥитэ ордук кыһалҕалаах, үҥсүү киирэр маршруттарынан 5 уонна 7 №-дээхтэр буолаллар. Сарсыарда уонна киэһээ өттүгэр манна улахан КАВЗ оптуобустары көмөҕө таһаарар буоллулар.
Дьокуускай куорат олохтоох дьаһалтатын Суолга-тырааныспарга сулууспата тиһэх тохтобуллартан саҕалаан бэрэбиэркэлэри ыыппытын түмүгэр, эбии улахан оптуобустары линияҕа таһаарар дьаһал ылылынна.
Санатан эттэххэ, куорат иһигэр сүүрэр КАВЗ оптуобустар 84 пассажирскай миэстэлээхтэр (28 олорор уонна биир инбэлиит кэлээскэтин миэстэтэ), куорат кытыытыгар сылдьар оптуобустар 35-тэн 39-ка диэри миэстэлээхтэр. «Вектор» типтээх оптуобуска миэстэтэ – 30.
Саҥа оптуобустар биһиги тыйыс усулуобуйабытыгар үлэлииргэ анаан таҥыллыбыттара, иккилии хос түннүктээх, салон иһигэр эбии ититиилээх, кондиционердаах буолаллар. Итини сэргэ кыһыҥҥы тумаҥҥа ыраахтан көһүннүн диэн кыһыл өҥнөөх оптуобустары талбыттара.
ОДьКХ салаатын “D” категориялаах суоппардарын
ЯПАК МУТ үлэтин күүһүрдүүгэ ыыталлар
ЯПАК МУТ салайааччыта Иннокентий Сергучев иһитиннэрбитинэн, тоҥон турбут оптуобустары ириэриэхтэрэ, суоппардарга медосмотр уонна инструктаж ыытыахтара.
Баһылык Евгений Григорьев хомунаалынай тэрилтэлэри куорат олохтоохторун өйүүргэ, кыһалҕаны быһаарарга көмөлөһөргө ыҥырда.
Ааспыт нэдиэлэ түмүгүнэн ЯПАК МУТ графигы толоруута – 98,8%, «Союз Авто» 86,8% тэҥнэспит.
"Тута сибээс" линиятыгар 300 кэриҥэ киһи эрийэн, оптуобустар сырыыларын схематын, арыттарын ыйыталаспыт.
Муниципальнай бырагыраама оҥоһуллуоҕа
Баһылык Евгений Григорьев оптуобус суоппардарын үлэҕэ ылыыга муниципальнай бырагырааманы үлэлэтиэххэ диэн этии киллэрэр.
Киин куорат оптуобустарыгар суоппар тиийбэт кыһалҕата хаһааҥҥытааҕар да сытыытык турарын бары билэбит. Онтон сиэттэрэн муниципальнай бырагырааманы оҥорон, араас өйөбүл миэрэлэрин тобулан, саҥа идэтийбит каадырдары угуйуохха сөп диэн Евгений Григорьев дьаһалта бэнидиэнньиктээҕи планеркатыгар этии көтөхтө.
Сонуннар
Ордук ааҕаллар
