Оптуобус бырайыаһа үрдүүр. Хаһааҥҥыттан?

– Киирээри турар уларыйыылар усулуобуйаларыгар хайдах дьаһанабыт? Уустук ыйытыы. Массыына саппаас чааһын атыылаһабыт, гараас арендалыыбыт, үлэһиттэрбитин хамнастыыбыт, уматык, бааннар өҥөлөрүн  сыаналара үрдүү турар. Бу боппуруостарынан кэлэр нэдиэлэҕэ куорат баһылыга Евгений Григорьевы кытта дьүүллэһээри былааннанабыт.

Куорат салалтата туох кыалларынан көмөлөһө, өйүү сатыыр эрээри, бүддьүөт эрэһиинэ буолбатах. Онон кэлэр сылтан бырайыас сыанатын үрдэтэргэ күһэллиэхпит. Манна «Хаһааҥҥыттан?» диэн эрэ ыйытыы турар – тохсунньу ыйтан дуу, былырыыҥҥы курдук муус устартан дуу?

Эбэн эттэххэ, тохсунньуга харчы хамсаабат үгэстээх. Оттон лиизининэн ылбыт оптуобустарбыт харчытын төлүөххэ наада, – диэн Андрей Косицкай «Эхо столицы» кэрэспэдьиэнигэр хоруйдаата.