Оптуобуһунан айаннаан иһэн былыргы номохтору истэр буолуохпут
Алтынньы 15 күнүттэн куорат олохтоохторо уонна ыалдьыттара оптуобуһунан айаннаан иһэн Туймаада хочотун туһунан былыргы номохтору истэр буолуохтара. Ол курдук, бу күн QR-куод көмөтүнэн үлэлиир аудиогидтээх “ЯПАК” тэрилтэ 15 оптуобуһа линияҕа тахсыаҕа.
Мантан ыла биһиги айаммытын «Саха Тыла 400» уопсастыбаннай хамсааһын актыбыыстара бэлэмнээбит номохторо киэргэтиэхтэрэ. Ол курдук, оптуобуска олорон Дьокуускай куорат төрүттэниитин, Улуу Хоро, Омоҕой Баай, Эллэй, Тыгын Дархан, мусуойга үөр буолбут удаҕан, Чочур Мыраан уонна Шергин шахтатын туһунан былыргы номохтору истиэхпит, Туймаада хочотун туһунан элбэҕи билиэхпит.
Маны таһынан, оптуобуһунан айаннааччыларга анаан “Дьокуускай суоппардар харахтарынан” аудиогид тахсыаҕа. Ол көмөтүнэн хас күн аайы куораты биир гына тилийэ сүүрэр дьоммут кэпсээннэрин истиэхпит.
Ону сэргэ оптуобус салоннарын талааннаах худуоһунньук Мира Аргунова Туймаада номохторугар аналлаах уруһуйдара киэргэтиэхтэрэ, оттон суоппардар кэпсээннэрин эдэр худуоһунньуктар скетчтэрэ ситэриэхтэрэ. Дизайн макетын “Үлэ кыбаартала” кластер резиденэ, “Сулусчаан” дизайн устуудьуйата оҥоруоҕа, оттон оптуобус салоннарыгар NRG угуйук агентствота туруоруоҕа.
Инникитин хартыыналаах уонна QR-куодтаах видеоэрээттэри сылаас тохтобулларга көрдөрүөхтэрэ. Оттон бу кэрэхсэбиллээх бырайыак “ЯПАК” тэрилтэ оптуобустарыгар эрэ буолбакка, чааһынай тиэйээччилэр маршруттарыгар эмиэ тарҕаныаҕа.
Санатан эттэххэ, «СУОЛ» социокултуурунай бырайыак ВЭБ.РФ корпорация уонна Дьокуускай куорат Олохтоох дьаһалтатын өйөбүлүнэн олоххо киирэр.
Аудиогидтэри алтынньы 15 күнүгэр https://suolyakutsk.ru саайтка уонна бырайыак https://suolyakutsk.ru тг-ханаалыгар таһаарыахтара.
Сонуннар
Ордук ааҕаллар
