Быйыл култуура 7 эбийиэгэ хапытаалынай өрөмүөннэнэр

Ол курдук, улахан өрөмүөн Судаарыстыбаннай Опера уонна балет тыйаатырыгар, Национальнай художественнай түмэлгэ, Национальнай библиотекаҕа, Саха академическай тыйаатырга ыытыллыахтаах.

Маны таһынан Покровскай “Саргы түһүлгэтэ” култуура уонна норуот айымньытын киинигэр, Анаабыр улууһун кыраай үөрэтэр этнографическай түмэлигэр, Сэбиэскэй Сойуус Дьоруойа Ф.М. Охлопков аатынан кыраайы үөрэтэр музей өрөмүөннэниэхтэрэ.

Холобур, Опера уонна балет тыйаатырыгар өрөмүөн үлэтэ икки сыл устата барыаҕа. Быйыл көрөөччү олорор саалатын муостата, фойе, камернай саала, буфет, гардероб, дьиэ тас өттө оҥоһуллар. Маныаха быйыл 13 мөл. солк. субсидия көрүллүбүт, эһиил – 38 мөл. солк. көрүллүөхтээх. Бэдэрээтчит – “Синтра” ХЭТ, өрөмүөн бастакы түһүмэҕэ балаҕан ыйыгар түмүктэниэҕэ. 2027 сылга үбү-харчыны гримернайдары, репетициялыыр саалалары, худуоһунньуктар үлэлиир сирдэрин, костюмернайдары тупсарыыга тыырыахтара. Бэлиэтээн эттэххэ, маннык улахан өрөмүөн тыйаатыр арыллыаҕыттан, 45 сылтан тахса, биирдэ да оҥоһулла илик.