Опера уонна балет тыйаатыра – бастыҥнар кэккэлэригэр

Москваҕа Большой тыйаатыр Бетховен саалатыгар «Пушкинская карта» бириэмийэни туттарыы үөрүүлээх тэрээһинигэр Суорун Омоллоон аатынан Опера уонна балет судаарыстыбаннай тыйаатыра «Лучший региональный театр» анал аат лауреатынан буолла. Наҕарааданы тыйаатыр дириэктэрэ Владислав Левочкин тутта.

«Бу биһиги өрөспүүбүлүкэбит ыччата классическай искусствоҕа тардыһарын, биһиги тыйаатырбытыгар буолар опера уонна балет саҥа туруорууларын сэҥээрэрин көрдөрдө. Тыйаатыр ыччаты салгыы угуйар, бу кыайыы кини туруорууларыгар интэриэс күүстээҕин бигэргэтэр», – диэн бэлиэтээтэ СӨ Ил Дархана  Айсен Николаев.

Ол курдук, 2024 сылга Суорун Омоллоон аатынан Опера уонна балет судаарыстыбаннай тыйаатырын «Подвиг» балетыгар «Пушкин каартатынан» 335 тыһ. солк. суумаҕа 704 билиэт атыыламмыт. «Лебединое озеро» («Пушкин каартатынан» туһаммыт көрөөччү ахсаана –  458),  «Ромео и Джульетта» (409) уонна «Щелкунчик» (376) балеттар ыччат киэҥ сэҥээриитин ылаллар.  Оттон опералары ылан көрдөххө: «Евгений Онегин» – 461, «Ньургун Боотур» – 197, «Зори здесь тихие» – 190 эдэр көрөөччү «Пушкин каартатынан» төлөөн сылдьыбыт.

Санатан эттэххэ, «Дьиэ кэргэн» национальнай бырайыак чэрчитинэн олоххо киирэр «Пушкинская карта» бырагыраама ыччат култуура тэрээһиннэригэр сылдьарын көҕүлүүр, искусство бастыҥ айымньыларын билсэригэр кыах биэрэр.

Хаартыска: СӨ Ил Дарханын уонна Бырабыыталыстыбатын пресс-сулууспата