Оо, сэлээппэ, сэлээппэ!

— Туйара-Тутума Тумусова диэммин. Урут "пенсионерка из Якутии" диэнинэн биллэр этим. Бу тэрээһини биэнсийэҕэ тахсан баран толкуйдаабытым, ол эрээри  маннык элбэх киһи кыттыаҕа диэн санааҕа да суоҕа. "Чэ, сүүрбэччэ буолуохпут" дии санаабытым. Бүгүн 70-тан тахса кэрэ аҥаар кэлбититтэн олус үөрдүм.

Саамай кыра кыттааччы 3 саастаах. Саамай аҕаларбыт — 83, 86, 88 саастаах Далбар Хотуттар.

Сэлээппэлэрэээ! Хас биирдиилэрэ ураты көстүү! Хатыламмат айымньы!
Куораппыт проспегын ортотунан бары мааны таҥастаах, кыраһыабай сэлээппэлээх 
хаамсан долгулдьуһан  иһэрбитин көрбүт эрэ барыта сөхпүт, астыммыт этэ.

Кыттааччылар бэйэлэрэ  астыммыттара ордук долгутуулаах. "Хаһан да кэппэтэх былаачыйаларбытын кэппиппит үчүгэйиин!"  — диэн аҥаардас махтаныылара долгутта.

Бу идея билэр дьонум, дьүөгэлэрим сэлээппэҕэ аналлаах бырааһынньык баара буоллар диэн баҕа санааларын этиилэриттэн саҕаламмыта. Оччолорго флешмоб оҥорорго быһаарыммыппыт. Ол кэнниттэн сыл аайы от ыйын 15 күнүгэр маннык тэрээһини ыытыаҕыҥ диэн сүбэҕэ кэлбиппит.

Түгэнинэн туһанан бары кыттааччыларбар махтанабын.