«Онкопоисксаха.рф» улахан көдьүүстээҕин көрдөрбүт

Онуоха федеральнай «Доруобуйа харыстабыла» национальнай бырайыак чэрчитинэн үлэлиир «Онкопоиск» бырайыак көмөлөһөр. Саха сиригэр бу үлэни өрөспүүбүлүкэтээҕи Искэн диспансера иилээн-саҕалаан ыытар.

Доруобуйа харыстабылын министиэристибэтэ иһитиннэрэринэн, «Онкопоисксаха.рф» вебплатформа үлэтин саҕалыаҕыттан 30-тан тахса тыһыынча Саха сирин олохтооҕо туһаммыт, бастакы анкеталааһыны ааспыт. Ол түмүгэр 75 киһиэхэ араак ыарыы бастакы стадията эрдэ быһаарыллыбыт, 1300 киһи анкеталааһын түмүгүнэн быраастар кэтэбиллэригэр ылыллыбыт.

"Онкопоисксаха.рф" вебплатформаҕа Саха сиригэр ордук киэҥник тарҕаммыт искэн 6 көрүҥэр скрининг оҥоһуллар: тыҥаны, суон, көнө оһоҕостору, быары, эмиийи, маатканы, эр дьоҥҥо самах быччархайын (предстательная железа) бэрэбиэркэлиир ыйытыктарга эппиэттиибит. Бу хомуллар дааннайдарга олоҕуран ыалдьа сылдьар уонна ыалдьыан сөптөөх дьону онкология диспансерыгар сиһилии чинчийиигэ ыыталлар.

Үчүгэйэ диэн дьиэттэн да тахсыбакка олорон, Онкопоиск саайтыгар киирэн, бэлэм ыйытыкка хоруйдуубут. Ол түмүгүнэн босхо ОМС чэрчитинэн бэрэбиэркэҕэ барсаргын дуу, барсыбаккын дуу быһаараллар. Чопчу бириэмэ анаан ыҥыраллар. Онон уочаракка олорбоппут. Чинчийиигэ лабораторнай анаалыс, инструментальнай чинчийии, УЗИ диагностика, кыра дозалаах көмпүүтэр томограмматын барыы киирэллэр. Эйигиттэн сөбүлэҥиҥ, пааспарыҥ, ОМС полиһыҥ эрэ ирдэнэр.

Сайт: «Онкопоисксаха.рф»

Онкодиспансер регистратуратын нүөмэрэ: +7-962-731-18-00

Үлэ күннэригэр сарсыарда 09.00 чаастан 16.30 чааска диэри билсиҥ.

Искэн ыарыытыгар сыһыаннаах суукканы эргиччи үлэлиир «итии лииньийэ»: +7 (914) 270-53-79.

Бүтүн Арассыыйатааҕы онкология ыарыылаахтарга көмөлөһөр «итии лииньийэ»: 8 (800)100-01-91.