ОМС үбүлээһинин үрдэппиттэр

ОМС чэрчитинэн биир страховкалаах киһиэхэ тиксиэхтээх нуорма  4 587 солк. эбиллэн (6%), 80 тыһ. 495 солк. 27 харчыга тэҥнэспит.

ОМС  Саха сиринээҕи пуондатын дириэктэрэ Александр Горохов эппитинэн, ол түмүгэр мэдиссиинэ босхо оҥорор бары көрүҥ өҥөлөрүгэр көрүллэр ороскуот улаатан биэрбит. Ол иһигэр ыарыыны эрдэттэн быһаарар сыаллаах көрүү, аныгы үрдүк технологиялаах мэдиссиинэ көмөтүн туһаныы, ыарыыны диагностыыр чинчийиилэри ыытыы эмиэ киирсэллэрин санаппыт. Холобур,  сүрэх-тымыр тиһигин чинчийэр улахан туһалаах, балачча сыаналаах УЗИ, КТ, МРТ өҥөтүнэн туһаныы эбиллэрэ үчүгэй бөҕө.

Өрөспүүбүлүкэ олохтоохторо ОМС үбүн суотугар быйыл 3 мөл. тахсата көрдөрүнэр, стационарга эмтэнэр буолбуппут. Ону тэҥэ 80 тыһ. – КТ-га, 28 тыһ. –МРТ-га, сүрэх-тымыр тиһигин көрөр УЗИ-га – 112 тыһ. тахса көрдөрүнүүнү былааннаабыттар.

Бу сылга ыарыыны эрдэттэн быһаарыыны күүһүрдэр сорук турбут.  Холобур, 18-тан 49–гар диэри саастаах эр дьон, дьахтар төрүүр-ууһуур кыахтара (репрудуктивное здоровье) хайдаҕын быһаарар сыалтан, профилактическай көрүүнү элбэтэр буолбуттар. Ол эбэтэр, ити бэрэбиэркэҕэ нэһилиэнньэ төрүүр-ууһуур кыахтаах араҥатын 35 %-тан  кырата суох бырыһыанын хабыахтара. Итини чопчу сыыппараҕа таһаарар буоллахха, 2026 сылга итиччэ саастаах 65 тыһ. эр киһини, 68 тыһ. кэрэ аҥаары көрүөхтэрэ. Диспансеризация ити көрүҥэр быйыл 871,7 мөл. солк. былааннаабыттар.  

Өрөспүүбүлүкэ  2025 сыл саҕаланыыта 1 006 561 нэһилиэнньэлээҕэ. Кэнники чахчы Сахастакка хойутуу тахсарын билэҕит. Аны, сыл устата киһи хайаан да ыалдьар буолбатах, ОМС тиһигинэн эрэ буолбакка, төлөбүрдээх мэдисиинэ өҥөтүнэн туһанааччылар эмиэ бааллар. Оттон ким эрэ сотору-сотору көрдөрүнэр. Онон ОМС-ка көрүллэр бу бачча үбүлээһин элбэҕин дуу, аҕыйаҕын дуу быһаарар уустук. Улахан ырытыы, тэҥнээн, суоттаан көрүү түмүгүнэн быһаардахтара диэн эрэнэбит.

Хаартыска: АГИП пресс-сулууспата ыыппыт иһитиннэриититтэн