Олунньу-ыам ыйдара: сааскы санитарнай ыраастаныы
Олунньу 1 күнүттэн бэс ыйын 1 күнүгэр диэри киин куоракка сааскы санитарнай ыраастаныы ыйдара биллэрилиннилэр.
Чуолаан олунньу-кулун тутар ыйдарга хаар, чэҥ, бөх ыраастааһына, тиэйиитэ ыытыллар; муус устар-ыам ыйдарыгар – носуос ыстаансыйаларын үлэлэтии, лотоктары ириэрии, субуотунньуктары тэрийии, халааны утары тэрээһиннэр, намыһах сирдэр ууларын хачайдааһын.
Куорат баһылыгын солбуйааччы Владислав Слепцов салайааччылаах санитарнай ыраастаныы ыстаабын быйылгы бастакы мунньаҕа хаары ыраастааһын хаамыытыгар тохтоото.
«Якутдорстрой» АУо чахчытынан, 2024 сыл алтынньы 15 күнүттэн, ол эбэтэр кыһын саҕаланыаҕыттан, 160 тыһ куб/м тахса иэннээх хаар тиэйиллибит (тэрилтэ бэйэтин күүһүнэн – 12 тыһ куб/м); 2025 сылга үктэнэн баран – 60 тыһ. куб/м.
Уулуссалары грейдердээһин уонна халтарааны утары тэрээһиннэр эмиэ былаан быһыытынан ыытылла тураллара бэлиэтэннэ.
«Жилкомсервис» МУТ 770 куб/м иэннээх чэҥ ыраастаммытын, маны сэргэ ситэтэ суох хааччыллыылаах дьиэлэртэн 200 куб/м убаҕас бөх тоҥмута тиэйиллибин туһунан отчуоттаата.
Үөрэх, култуура, доруобуйа харыстабылын тэрилтэлэрин, уокуруктар, нэһилиэктэр бэрэстэбиитэллэрэ эмиэ хаары, чэҥи ыраастааһын хаамыытын отчуоттаатылар.
Куорат баһылыгын солбуйааччы Владислав Слепцов санитарнай ыраастаныы хаачыстыбата бары сулууспалар, тэрилтэлэр биир баайыыга үлэлииллэриттэн тутулуктааҕын бэлиэтээн туран, хонтуруолу күүһүрдэргэ сорудахтаата, диэн Олохтоох дьаһалта пресс-сулууспата иһитиннэрэр.
Сонуннар
Ордук ааҕаллар
