Олунньу 25-26 күннэригэр анал байыаннай дьайыы кыттыылаахтарыгар босхо сир учаастактарын биэрии бастакы түһүмэҕэ саҕаланар

Дойду баһылыга Владимир Путин 2023 сыл бэс ыйыгар анал байыаннай дьайыы кыттыылаахтарыгар социальнай өйөбүл эбии миэрэлэрин туһунан дьаһалынан регионнарга босхо сир учаастактарын биэриини көрөргө көҕүлээбитэ.
Ол чэрчитинэн 2023 сыл сэтинньи ыйыгар Саха Өрөспүүбүлүкэтин Ил Түмэнэ өрөспүүбүлүкэ Сирин кодексатыгар уларытыылары киллэрэн, анал байыаннай дьайыы кыттыылаахтарыгар кэтэх хаһаайыстыбаны туталларыгар уонна дьиэ тутталларыгар анаан сир учаастагын биэрэр туһунан дьаһал ылыллыбыта. 
Бүгүҥҥү күҥҥэ Дьокуускай куоракка пропискалаах буойуннарга анаан 1396 учаастак оҥоһуллан турар. Сарсын-өйүүн, олунньу 25-26 күннэригэр, бастакы 100 байыаска уонна кинилэр дьиэ кэргэттэригэр Табаҕа уонна Киллэм оройуоннарыгар сирдэр бэриллиэхтэрэ. 
> *Дьокуускай куоракка анал байыаннай дьайыы кыттыылаахтарыгар сир учаастактарын биэрии бастакы түһүмэҕэ ыытыллар аадырыһа: *
> Октябрьскай уул., 20/1, 3 этээс, (каб. 303), «Сир сыһыаннаһыыларыгар агентство» МХТ
> Бириэмэтэ: 09.00 – 12.00 чч. 
Анал байыаннай дьайыы кыттыылаахтарыгар сир учаастактарын биэрии туһунан сиһилии 40-80-46 билсиэххэ сөп. 

Санатар буоллахха, аҕыйах хонуктааҕыта Дьокуускай куоракка Анал байыаннай дьайыы кыттыылаахтарын боппуруостарынан дьарыктанар уопсастыбаннай сэбиэт тэриллибитэ. Сэбиэт сырдатыы, быһаарыы, көмөнү оҥоруу үлэтинэн, ол иһигэр сир учаастактарын түҥэтиигэ кыттыынан дьарыктанара сабаҕаланар.