Олорон эрэн утуйбуттаахпын

Оччолорго Нэһилиэнньэҕэ бытовой өҥөнү оҥорор кэмбинээккэ иистэнньэҥнэр, атах таҥаһын улларааччылар, хаартыскаҕа түһэрээччи уонна парикмахер үлэлиирэ. Маҥан оппуохалаах дьааһыла эргэ дьиэтэ дэриэбинэбит хабыллар хаба ортотугар турара.

Мин оччолорго, үөрэххэ киирбэккэ төннөн кэлэн, оскуолабар библиотекардаабытым. Киин библиотека салалтата миэхэ "списаниеҕа тахсыбыт кинигэлэри аакталаан суох оҥороҕун, ону оҕолор көрбөттөрүгэр дьаһайаҕын" диэн сорудахтаабыта. Мин онуоха буолунай, эргэрбит, алдьаммыт кинигэлэри мунньан, аахталаан баран, интэринээт уолаттарынан оскуолабыт бөх уматар сиригэр тастаран, туох да улахан кулуһун оттон, үөрэ-көтө, мэниктии уматан турабыт. Билигин эбитэ буоллар, эппиэккэ тардыллыахтааҕым буолуо. Саатар учууталларым, дириэктэр да сэмэлээбиттэрин өйдөөбөппүн.

Чэ, ити кылгас киирии курдук кэпсээтим да, арыый уһаан хаалла.

Мин дьэ баттахпын эрийтэриэхпин, олуһун диэн киэргэниэхпин, кырысаабысса буолуохпун баҕардым. Сопхуоска ыанньыксыттыы тахсыбыт бииргэ үөрэммит кыргыттарым бары химкаланан, туох да мааны буолан сылдьаллар.

Парикмахербыт атын учаастактан биһиги оскуолабытыгар кэлэн үөрэнэригэр, интэринээт аһыллыар диэри биһиэхэ олорбута, онон эдьиийим курдуга, саҥаһым балта этэ. Онон, бэйэ билэр киһилээх буолан, баттахпын химкалата бардым.

Оччолорго билигин курдук чаас иһинэн бүппэккин, аччаабыта икки чаас, уһаатаҕына үс чаас курдук бириэмэҥ баранар. Хайыаҥый: “Красота требует жертв и времени” буоллаҕа. Баттаҕым кылгаһа суох, санныбыттан түһэр, онон олус уһуннук араас тэрил анныгар олорон, итиинэн үрдэрэн, туох да били эстрада ырыаһыта Игорь Корнелюк курдук арбаҕар куудара баттахтаммытым, эбиитин төгүрүк, улахан оправалаах ачыкылаахпын.

Дьиэбэр кэлбиппэр ийэм соһуйуу бөҕөтө, олох сөбүлээбэтэ, били Дикий Запад сүүрээнэ киирбит диэн сэмэлээтэ. Онно эрэ кыһаммаппын, сиэркилэттэн арахсыбаппын.

Киэһэ утуйуу буолла. Мин дьэ утуйуом баара дуо, сыттыкка сыттахпына баттаҕым сарсыныгар көнөн хаалыа диэн сэрэнии бөҕөтө. Төбөбүн хайдах эрэ сыттыкка сытыарбатах киһи диэн араастаан умса сытан көрүү, ойоҕоспунан баттахпын биир өттүгэр эргичитэ сылдьан сытыы. Ыксаан олорон эрэ утуйа сатаатым. Хайыахпыный, уум кэлэн утуйан хааллаҕым дии. Сарсыарда ойон тураат баттахпын тутан көрдүм, сиэркилэҕэ ыстанным, һуу, хата, көммөтөх, куударам баар эбит.

Ол куударам сыл аҥаара курдук сылдьыбыта быһыылааҕа, эдьиийим эмин даҕаны хойуутук тутуннаҕа, бэйэ киһитигэр диэн; сорохтор киэнэ сотору буолаат көнөн, миэхэ ымсыыраллара, ордуҕургууллара.

Онон химка оҥотторуутугар бастакы сүрэхтэниим оннук ааһан турардаах.