Олох очуругар оҕустарбыттарга уопсай дьиэ сыбаайата түстэ

Дьокуускайга 17-с кыбаарталга олох очуругар оҕустарбыттарга быстах кэмҥэ олорор 9 этээстээх, 120 хостоох бастакы уопсай дьиэ сыбаайатын түһэрдилэр. 
Бэлиэ түгэҥҥэ куорат баһылыга Евгений Григорьев кыттан, саахалланар туруктаах дьиэҕэ олорор дьоҥҥо аналлаах анал тутуу Дьокуускай куоракка аан бастаан ыытылларын бэлиэтээтэ.
Евгений Григорьев иһитиннэрбитинэн, ааспыт сылга 17-с кыбаарталга көтүрүллүбүт үс мас дьиэ олохтоохторо территорияны кэлимник сайыннарыы дуогабарынан саҥа дьиэҕэ көһөрүллүбүттэрэ. Мантан салгыы 40 000 кэриҥэ киһини олорор дьиэнэн хааччыйар сорук турар.
Дойду баһылыга Владимир Путин сорудаҕынан Дьокуускай куоракка 2023 сыл балаҕан ыйын 1 күнүгэр диэри хаарбаҕынан билиниллибит дьиэ барыта көтүрүллүөхтээх.
Маныаха «Переселение граждан из аварийного жилищного фонда городского округа «город Якутск» на 2023-2027 годы» диэн муниципальнай бырагыраама үлэлиир, диэн Олохтоох дьаһалта пресс-сулууспата иһитиннэрэр.