Олох киэҥ аартыгар атаардылар

Аан дойдуга Музей күнүгэр ыам ыйын 18 чыыһылатыгар Ем. Ярославскай аатынан Саха музейа быйыл оскуоланы бүтэрээччилэргэ анаан «Белые паруса» диэн ааттаах тэрээһинэ буолан ааста.

«Якуцкъ» шлюпканы үтүгүннэрии хараабыл үрүҥ баарыстарын анныгар 1977-1994 сс. выпускниктар быйыл оскуоланы бүтэрээччилэри олох киэҥ аартыгар атаардылар.

Октябрина Петровна Максимова, Ем. Ярославскай аатынан Саха музейын сырдатар-үөрэтэр салаатын  сэбиэдиссэйэ:

– Биһиги музейбытыгар «Белые паруса» диэн быйыл оскуоланы бүтэрээччилэргэ анаммыт тэрээһиммит үһүс сылын ыытылынна.

Култуура уонна духуобунай сайдыы министиэристибэтин  миниистирэ Афанасий Ноев идеятынан бастаан 2023 сыллаахха ыытыллыбыта. Сыала-соруга ыччаты патриотическай тыыҥҥа иитии. Быйыл өрөспүүбүлүкэ оскуолаларын араас сылларга бүтэрбиттэр түмсүүлэрэ (сал. Альберт Соров) бу тэрээһиҥҥэ кыттыыны ылан, выпускниктарга кэс тылларын тириэрдиилэрэ уонна  оҕолордуун бииргэ флешмоб туруораннар (сал. А.С. Иванова), тыыннаах холобур буоллулар.

Саха музейа бу тэрээһиммитин быйыл иккис сылбытын Саха АССР оскуолаларын 1985 сыллаахха бүтэрбиттэр өрөспүүбүлүкэтээҕи түмсүүлэрин (сал. Алексей Васильев) кытта сүбэлэһэн ыытабыт. Кинилэр 2024 сылга «Пять лет вместе», оттон быйыл «Время и Память» диэн улахан быыстапкалары бэйэлэрин көҕүлээһиннэринэн туруораннар, ыкса сибээстээхтик үлэлиибит. «Үтүө дьыала Кубога» диэн өрөспүүбүлүкэ бары улуустарынан сылдьан үгүс үтүө дьыаланы оҥорбут кубоктарын  биһиги музейбытыгар үйэ-саас хараллыыга туттарбыттара бу күннэргэ Музей күнүгэр аналлаах быыстапкабыт биир сүрүн экспоната буолан турар.

Онон оскуоланы саҥа бүтэрээччилэри урукку сыллардааҕы выпускниктары кытта ситим бу «Белые паруса» тэрээһиммит нөҥүө оҥоһуллар.

Түгэнинэн туһанан П.Н.уонна Н.Е. Самсоновтар ааттарын сүгэр Хатас агро-оскуолатын кэлэктиибигэр (дириэктэр Н.В. Слепцов) махталбытын тириэрдэбит. Бу оскуола быйыл иккис сылын биһиги тэрээһиммитигэр выпускниктарын ыытан, кэнчээри ыччат дьонугар патриотическай иитиини иҥэрэр.

«Белые паруса» тэрээһиммит үрдүк таһымнаахтык ыытылларыгар күүс-көмө буолбут бука бары урукку выпускниктарга уонна Хатас орто оскуолатын бүтэрээччилэргэ махталбытын тириэрдэбит.

Быйылгы выпускниктарга эксээмэннэригэр үрдүк ситиһиилэри баҕарабыт. Кинилэр олохторун баарыһа эрэллээхтик, олох устун көнөтүк, сыаллаахтык уһуннун.

Хаартыскалар: Ааптар түһэриилэрэ