08.03.2022 | 16:30

Олох, Instagram уонна VPN

Олох, Instagram уонна VPN
Ааптар: Айталина Софронова

Кистэл буолбатах, олохпут-дьаһахпыт аҕыйах хонук иһигэр тосту уларыйда. Арассыыйаҕа интэриниэт ситимин араарыы туһунан боппуруос бэрт элбэхтик күөрэйэр буолла. Социальнай ситимнэр уонна интэриниэт арахсар түгэнигэр чуолаан эдэр дьон ыарырҕатыахтарын сөп дииллэр. Ол туһунан биһиги ыччаттан бэйэтиттэн ыйыталастыбыт.

Туйаара Лазарева, ХИФУ 5-с кууруһун устудьуона:

— Үтүө күнүнэн! Куйаар ситимин үлэтэ хааччахтаммытыгар наһаа аймамматым, тоҕо диэтэр дойду үрдүнэн оннооҕор буолуох улахан кыһарҕаннар буола тураллар.

Социальнай ситимҥэ  сыһыаным үчүгэй, туох да куһаҕаны көрбөппүн. Тоҕо диэтэр, билигин туох баар сонуну, туһалааҕы барытын куйаар ситимиттэн булабыт, билэбит. Дьон үлэтэ да буолуон сөп, онон аныгы олоххо олус наадалаах дии саныыбын.

Холобур, миэхэ инстаграм, бастатан туран, үлэм, бу балаһаакка көмөтүнэн килийиэннэрбин булабын. Иккиһинэн, сонуннары билэбин, саҥаны көрөбүн, бириэмэ атаарабын. Үсүһүнэн, үөрэхпэр наадалаах, холобур, инстаграм нөҥүө английскай тылбын сайыннарабын, үөрэнэбин. Төрдүһүнэн, фотоальбом курдук дии, ол иһин олох  түгэннэрин хатыыбын, кэлин көрөргө, саныырга олус үчүгэй.

Мин санаабар, билигин Арассыыйаҕа инстаграмы саптахтарына, дьон барыта “ВКонтакте” ситимҥэ көһүөҕэ. Онно эмиэ инстаграм курдук сторизтардаах, туһанарга судургу.

 

Дмитрий Барашков, ХИФУ 3-с кууруһун устудьуона:

Мин социальнай ситимҥэ сыһыаным үчүгэй. Куйаар ситимэ миэхэ доҕотторбун, дьиэ кэргэммин кытта кэпсэтэрбэр, сонун үллэстэрбэр туһалыыр. Онон ситим хаппат, үлэлээбэт буолбута сотору көнүөҕэ диэн эрэнэбин. Ордук сөбүлээн бассаабы туттабын. Онтон инстаграмы сэргэхсийэ таарыйа көрүөххэ сөп. Сториһа быдан ордук дии саныыбын, дьон билигин тугу дьарыгыра сылдьарын көрдөрөр. Оттон публикация электроннай альбом оруолун толорор.

 

Чаҕыл Петров, ХИФУ 2-с кууруһун устудьуона:

Дороболорун! Мин социальнай ситимҥэ сыһыаным эриэ-дэхси. Арассыыйаҕа бары ситимнэр сабыллар түгэннэригэр, ордук эдэр ыччат оҕустарыыны ылыаҕа. Күндү ааҕааччы, “ тоҕо?” диир буоллаххына, судургутук көрдөххө, көрүнньэҥ олоххо бары үөрэнэн хаалбыттар.Эмиэ да толкуйдаан ыллахха, бу билиҥҥи үйэбитигэр олус наада. Холобур, бассаап, телеграм, Zoom. Мин бу ситимнэри туттабын даҕаны, наадыйабын даҕаны. Ыраах олорон бассаап бөлөххө баар дьоннорго информация тиэрдэбин, бэйэбэр наадалаах сонуннары билэбин.Ол гынан баран сымыйа информация бөҕөтө тарҕанар уонна бириэмэҕин туһата суохха атаараҕын. Арай күн сарсын инстаграмы саптахтарына, бастаан ыарахаттары көрүөм этэ. Ол гынан баран сотору кэминэн үөрэнэн хаалыам дии саныыбын . Инстаграмы бэйэм иллэҥ бириэмэбэр тутабын, ол эрээри бириэмэ бөҕөтүн сиириттэн хомойобун. Суох буолар түгэнигэр, бириэмэбин туһалаахха атаарыам этэ дии саныыбын. Инстаграмҥа ордук сториһы сөбүлээн көрөбүн.

 

Сергей Петров, ХИФУ устудьуона:

— Мин санаабар, социальнай ситимнэр биһиэхэ бэйэ-бэйэни кытта кэпсэтииттэн саҕалаан аан дойду сонуннарыгар тиийэ билэргэ көмөлөһөллөр. Онон Арассыыйаҕа хааччахтанара олохпутугар куһаҕаннык дьайыа дии саныыбын. Ол гынан баран билиҥҥи уустук кэмҥэ социальнай ситимнэринэн сымыйа сурах-садьык тарҕамматын туһугар судаарыстыба хааччахтыырын сөпсөһөбүн. Бэйэм бассаапка кэпсэтэбин, инстаграмҥа постары уонна сторизтары көрөбүн, телеграм уонна ВКонтакте балаһааккаларыгар сонуннары ааҕабын. Ордук инстаграм функцияларын сөбүлүүбүн. Пост таһаарарга үчүгэй хаартыска уонна интэриэһинэй текст наада, ол иһин сторизтары ордоробун. Онон бу ситимнэр букатын сүтэн хаалыахтара диэн өйбөр киирбэт.

 

Степан Слепцов, ХИФУ устудьуона:

— Социальнай ситимҥэ улаханнык олорбот буоламмын, наһаа аймамматым. Телеграмы сөбүлээн туттабын. Элбэх сибиэһэй информацияны, олоххо туох буола турарын билэбин.

 

Алина Гаврильева, ХИФУ устудьуона:

— Мин санаабар, биһиги кэммитигэр социальнай ситим улахан оруолу оонньуур. Иллэҥ кэммитигэр инстаграм, Тик-Ток, Твиттер ситимнэригэр «олорорго» үөрэнэн хаалбыппыт. Тус бэйэм социальнай ситими куруук туттабын. Олоҕум кэрчиктэрин, интэриэһинэй кэмнэрбин үллэстэбин, элбэх дьону кытта кэпсэтэбин уонна чугас дьонум, доҕотторум тугу гына сылдьалларын көрөбүн. Инстаграм диэн улахан платформа, дьон онно бэйэтин олоҕун туһунан эрэ үллэстибэт, блогерствонан, рекламанан уо.д.а. харчы эмиэ оҥороллор. Үгүс дьоҥҥо инстаграм элбэх ааны арыйар. Оттон миэхэ доҕотторбун, аймахтарбын эрэ кытта сибээстэһэр социальнай ситим. Ол иһин, үлэлээбэт түгэнигэр, элбэҕи сүтэрбэт курдукпун.

 

Алексей Шелковников, ХИФУ устудьуона:

— Мин социальнай ситиминэн сөбүлээн туһанабын. Хааччахтааһын киирэриттэн санаарҕыыбын. Инстаграмҥа күннээҕи олохпуттан сонуннары киллэрэбин, чугас дьонум ону көрөн тугунан дьарыктанарбын, хайдах үөрэнэрбин, кимниин доҕордоһорбун билэ олороллор. Инстаграмҥа биллэриилэри, рекламалары көрөбүн. Блогердары сэҥээрэбин. Наадыйарбын эмиэ инстаграм нөҥүө булабын. Бассаапка, телеграмҥа, фейсбукка эмиэ баарбын. Түргэн сибээһинэн барытын билэ-көрө, билсэ сылдьарым табыгастаах. Инстаграм үлэлээбэтэҕинэ, таһаарбыт постарым сүтэллэр, историябын харыһыйабын. Постааҕар сториһы ордоробун, көрөбүн

Сонуннар

Ордук ааҕаллар

Ырыанан аата тилиннэ
Дьон | 05.05.2022 | 11:00
Ырыанан аата тилиннэ
Ааспыт үйэ 60-70 сыллара... Эдэркээн киһи бэйэтин хоһооҥҥо холонор... Тыа сирин муҥкук, сэмэй уола оччотооҕуга хантан билиэ, сэрэйиэ баарай, инники олоҕун оҥкулун...   Олох диэн дьикти. Өлбүт да кэннэ иккистээн тиллэр, олох олорор диэн баар буолар эбит. Кини орто дойду олоҕуттан арахсыбыта быданнаабытын кэннэ... ол хоһооннорун нөҥүө тилиннэ, бэйэтэ суруйан хаалларбытыныы,...
«Күөх Ньурба»: айылҕа эмтиир күүһүн туһанан
Дьон | 06.05.2022 | 15:00
«Күөх Ньурба»: айылҕа эмтиир күүһүн туһанан
Дьоҥҥо-сэргэҕэ үтүөнү оҥорор баҕа санааны олоххо киллэрэн, Ийэ айылҕабыт биэрэр сүдү күүһүн таба туһаныахха, онно эбии билиини-көрүүнү, сатабылы дьүөрэлээн, бизнес эйгэтигэр бэйэ суолун-ииһин булуохха сөп. Бүгүҥҥү дьоруойдарбыт тустарынан аҕыйах тылынан билиһиннэрдэххэ, итинник.      Дмитрий, Дайаана Саввиновтар 2013 сылтан дьиэ кэргэнинэн ыҥырыа иитиитинэн дьарыктаналлар. Бастаан ыал ийэтин дойдутугар – Сунтаарга үлэлээн саҕалаабыттар....
Бэртээхэй да идэ — бэтэринээр
Сонуннар | 04.05.2022 | 16:24
Бэртээхэй да идэ — бэтэринээр
Муус устар 30 күнүгэр Бэтэринээр күнэ буолан ааста.  Бу идэ биһиэхэ, сүөһүлээх-сылгылаах сахаларга, олус чугас. Биһиги Хатаспатыгар былыр-былыргыттан бэтэринээрдэр баар буоланнар, устуоруйаҕа киирбит аймалҕаннаах, элбэх сүтүктээх бруцеллез, сэллик курдук сыстыганнаах ыарыылар суох буолбуттара. Ама да ааспытын иһин, улахан хоромньуну таһаарбыт ыарыыны суох гынаары, саҥа атахха туран кэҥээн-тэнийэн эрэр хаһаайыстыбалары эһэн,...