Олоҥхону сөргүтүү, тарҕатыы судаарыстыбанан өйөнөр

Бүгүн-сарсын, от ыйын 4-5 күннэригэр, Нерюнгрига уочараттаах Олоҥхо ыһыаҕа буола турар.
Манна даҕатан бэлиэтээтэххэ, 2022 сылтан төрүт үгэстэри тарҕатыыга кылааттаах дьоҥҥо Ил Дархан бириэмийэлэрэ ананар. Бүгүҥҥү күҥҥэ 81 олоҥхоһут, оһуохайдьыт, тимир ууһа, норуот маастара Ил Дархан истипиэндьийэтин хаһаайыттара буоллулар. 
Судаарыстыбаннай истипиэндьийэ сыл аайы сэттэлии бастыҥ олоҥхоһукка, оһуохайдьыкка, тимир ууһугар уонна норуот маастарыгар туттарыллар. 
Чуолаан олоҥхоһуттары ыллахха, 2022 сыллаахха бастакы истипиэндьийэ хаһаайыттарынан Аркадий Захаров (Мэҥэ Хаҥалас), Василий Иванов-Чиллэ (Ньурба), Валентин Исаков (Уус Майа), Кирилл Никифоров (Үөһээ Бүлүү), Николай Тарасов (Чурапчы), Никандр Тимофеев (Сунтаар) уонна Пётр Тихонов (Мэҥэ Хаҥалас) ааттаммыттара.
2023 сыллаахха төрүт үгэһи – олоҥхону сөргүтүүгэ, тарҕатыыга кылааттарын иһин Ил Дархан бириэмийэтин лауреаттарынан Анфиса Авелова (Томпо), Маргарита Григорьева (Бүлүү), Иван Григорьев (Мэҥэ Хаҥалас), Николай Григорьев (Чурапчы), Алексей Николаев (Таатта), Дарья Осенина (Уус Майа) ааттаммыттара. 
2024 сыллаахха бастыҥ олоҥхоһуттарынан Владимир Данилов (Сунтаар), Сусанна Лазарева (Чурапчы), Любовь Платонова (Дьокуускай), Гаврил Спиридонов (Мэҥэ Хаҥалас), Мария Стручкова (Үөһээ Дьааҥы), Людмила Цой (Таатта) буолбуттара.
Олоҥхону сөргүтүүгэ, харыстааһыҥҥа уонна тарҕатыыга ураты кылаатын иһин Ил Дархан үйэ тухары бэриллэр истипиэндьийэтэ Сунтаар улууһуттан олоҥхоһут Никандр Тимофеевка анаммыта. 
Быйыл, 2025 сылга, Олоҥхо иккис уон сылын түмүгүнэн, олоҥхо Юнесконан аан дойду барҕа баайынан биллэриллибитэ 20 сылынан 
107 истипиэндьийэ ананыаҕа. Бириэмийэлэр үгэс быһыытынан сэтинньи 25 күнүгэр Олоҥхо күнүгэр туттарыллыахтара. 
Санатар буоллахха, төрүт үгэстэри сөргүтүү, харыстааһын, тарҕатыы иһин ананар истипиэндьийэ кээмэйэ 30 тыһыынча солкуобайга тэҥнэһэр уонна бириэмийэ анаммыта кэлэр ыйыттан биир төгүрүк сыл устата ый аайы бэриллэр. 
Дойду баһылыга Владимир Путин Саха Өрөспүүбүлүкэтин төрүт култууратын үрдүктүк сыаналыырын бэлиэтээн турар (Ил Дархан уонна Бырабыыталыстыба пресс-сулууспатын матырыйаалларынан).