Олоҥхо ыһыаҕын үтүө түмүктэрэ

Амма улууһугар урукку сылга буолан ааспыт Олоҥхо ыһыаҕа үтүө түмүгүн чахчыта  – “Амма улууһун сэдэх уус-уран оҥоһуктара" альбом буолан тахсыытын туһунан билистибит.

Ньургуйаана Ивановна Илларионова, П.А. Ойуунускай аатынан Саха тыйаатырын тэрийэр отделын салайааччыта:

– 2023 с. үс сыл курдук дойдубар Аммаҕа тахсаммын баһылыгы социальнай эйгэҕэ солбуйааччынан үлэлиир кэммэр улууспут үйэлэргэ муспут материальнай баайын-дуолун дьоҥҥо-сэргэҕэ тириэрдэр, көрдөрөр сыаллаах "Раритеты Якутии" альбом-каталокка киллэрэр баҕа санаам туолла.

Бу манна биир төһүү күүһүнэн Аммаҕа ыытыллыбыт Олоҥхо ыһыаҕа буолбута. Бу бэлэмигэр дьоммут бары турунан үлэлээн, музейдар экспонаттарын сөргүтүү үлэтигэр күүскэ ылсыбыппыт. Бу альбомҥа киирэр бары оҥоһуктары талыыга Габышева А.Л., Неустроева Г.Г. салайааччылаах ойуулуур-дьүһүннүүр музей чинчийэр-үөрэтэр экспедицията улуус бары нэһилиэктэринэн сылдьыбыта. Онон үрдүк таһымнаах, ирдэбиллээх сыһыаннарынан талан ылан, быһааран, экспонаттары каталогка киллэрии буолла.

Бу "Амма улууһун сэдэх  уус уран оҥоһуктара" 5-с альбом. Манна барыта 600-чэ оҥоһук үйэтитилиннэ. Ол курдук, 12-с үйэтээҕи кыптыый, 14-с үйэтээҕи Саха сиригэр саамай уһун кылыс, 19-с үйэтээҕи таба бытыгын саптарыгар кыбытан тигиллибит уһулуччулаах чаппараах уо.д.а.  Тус бэйэм эһэм Михаил Федотович Илларионов "ГДМ" диэн суруктаах бэчээтэ, эбэм Прасковья Леонтьевна Илларионова ытарҕалара, "сүрэх" киэргэлэ, "ПЛ" диэн суруктаах биһилэҕэ киирбиттэрин көрөн үөрдүм.

Биһиги музейдарбыт экспонаттара уонна чааһынай бас билиигэ сылдьар уус-уран оҥоһуктар каталокка киирэн олус кичэллээхтик кээмэйдэрэ, матыыйааллара, оҥоһуллубут тиэхиньикэлэрэ, сыллара, кимтэн уонна хаһан ылыллыбыттара, хаһаайыттара кимнээҕэ толору ыйыллан, тугунан да, хайдах да кэмнэммэт сүдү баай буолан эргилиннэ.

Санатан этэр буоллахха, Дьокуускай куоракка Ойуулуур-дьүһүннүүр музей саалатыгар “Раритеты Якутии: Амгинский улус” диэн ааттаах быыстапка балаҕан ыйын 20 күнүгэр диэри үлэлиир.