Олоҥхо ыһыаҕар кылааппытын киллэрдибит

Уус Алдан улууһуттан СӨ уус-уран оҥоһуктарын маастара Пелагея Васильевна Соловьева Дүпсүн нэһилиэгэ бу тэрээһиҥҥэ кыттыытын туһунан кэпсээтэ.

Пелагея Соловьева, СӨ уус-уран оҥоһуктарын маастара:

– Олоҥхо ыһыаҕар биһиги улуустан 60-тан тахса киһилээх дэлэгээссийэ кыттан, биир нэһилиэк холугар ситиһии баһаам.

Ол курдук, «Ситим» хомусчуттар ансаамбыллара «Өбүгэ ситимэ» диэн анал аакка тигистэ, хомуска удьуор уус ыччаппыт, импровизатор хомусчут Спиридон Иванов иккис миэстэни ылла, оскуола үөрэнээччитэ Дамира Дорофеева оҕо олоҥхоһуттарга эмиэ иккис миэстэни ылла, Дүпсүнтэн  төрүттээх Алина Герасимова олоҥхону толорууга анал аакка тигистэ.

Мин быыстапкаҕа булт тэрилин оҥорон илдьибиппин үгүс киһи сэҥээрэ көрдө. Билигин маннык уруккуну сөргүтүүнэн дьарыктанабыт. Ону таһынан  «Салама ыйааһына» диэн сиэргэ-туомҥа кытынным.

Оттон биир дойдулаахпыт, СӨ норуотун маастара, хомус ууһа, Кэбээйи нэһилиэгин күндү күтүөтэ Артем Киренскэй ааптарыскай ньыматынан «ҮРГЭЛ» хомуһу оҥоруу күөн-күрэһигэр барыта 13 уус кытынна. Манна Уус Алдан уустара үс сүрүн бирииһи ыллылар. Ол курдук, 1-кы миэстэни Байаҕантайтан төрүттээх Роман Готовцев-Мындыр Уус ылла. 2-с миэстэҕэ Дүпсүнтэн Спиридон Алексеев тигистэ, үһүс Петр Куличкин-Быйаман Уус (Мүрү) буолла.

Дьэ ити курдук Дүпсүн нэһилиэгэ Олоҥхо ыһыаҕар бэйэтин сэмэй кылаатын киллэрдэ.