Олоҥхо ыһыаҕар 120 волонтёр үлэлииргэ бэлэм

Ыһыахха үлэлииргэ 120 волонтер бигэргэннэ. Кыттыан баҕалаахтартан барыта 217 сайабылыанньа киирбит, олор истэригэр этэрээттэр лиидэрдэрэ, култуурунай бырагыраамалар, спортивнай эбийиэктэр, ыалдьыттары олохтооһун, аһылык уонна навигация сулууспаларын волонтердара бааллар. Манна Саха сириттэн эрэ буолбакка, Сахалин, Новосибирскай уонна Нижегородскай уобаластартан сылдьар оҕолор бааллар. 60-ча волонтер — Дьокуускай куораттан.

Куонкурус түмүгүн ааспыттар бэс ыйын 24 күнүттэн от ыйын 2 күнүгэр диэри бэлэмнэниини ааһыахтара. «Биһиги бырааһынньык кыһамньылаах хаһаайыттарын бэлэмниибит. Бу «Ыччат уонна оҕолор» национальнай бырайыак сыала-соруга — эппиэтинэстээх лиидэрдэри иитэн таһаарыы», — диэн бэлиэтииллэр СӨ Ыччат дьыалаларыгар министиэристибэтигэр.