Олеся, эн кыайыыҥ  – биһиги дьолбут!

Ольга Анатольевна, ийэтэ:

– Биһиги дьиэ кэргэммит киэн туттуута, тапталлаах кыыспыт Олеся туһунан кылгастык кэпсиэхпитин баҕарабыт. Олеся Дьокуускайдааҕы 34-с №-дээх оскуола үөрэнээччитэ. Оҕобутун инбэлиит, саҥарбат диэн кыбыстыбакка, барытыгар илдьэ сылдьан дьон ортотугар бэйэтэ сылдьарга үөрэннэ. Онон  уопсастыбаннай миэстэлэргэ, маҕаһыыҥҥа, оптуобуска бэйэтэ холкутук сылдьа үөрэммитэ биһиэхэ, төрөппүттэргэ, эмиэ кыайыы. Олесябыт көнө, сымнаҕас майгылаах, дьиэ кэргэнигэр куруук көмө-тирэх буолар. Оҕобут 14 саастаах эрээри, туруоруммут сыалын ситиһэр күүстээх санаатынан бииргэ төрөөбүттэригэр куруук холобур. Кыыс оҕо быһыытынан дьарыга баһаам. Илиинэн араас мааны салфетка, таҥас баайар, ас астыырын сөбүлүүр уонна, кэрэ буолуу эйгэтин интэриэһиргээн, тыҥырах оҥоруутунан дьарыктанар.

Василий Романович, аҕата:

– Ол эрээри кини саамай күүстээх өрүтэ – спорт. 2023 сыллаахха тренер Юрий Иванович Ощепков Олеся күүстээх майгытын бэлиэтии көрөн, ыараханы көтөҕүү (пауэрлифтинг) көрүҥэр ыҥырбыта.

Мин кыыс оҕоҕо сөбө суох диэммин бастаан аккаастаабытым. Ону тренербит 2 сылы быһа «кыыскын биэр” диэн тылыгар киллэрэн, оҕом бэйэтэ даҕаны сөбүлээн, хайыахпытый. сөбүлэстэҕим дии. Тренерин салалтатынан үс сыл иһигэр Олеся Саха сирин эрэ буолбакка, бүтүн дойду таһымыгар бэйэтин биллэрдэ.

Бу сыл ыам ыйыгар Бүтүн Арассыыйатааҕы күрэххэ кыттан, кыһыл көмүс мэтээли аҕалан барыбытын үөртэ! Онон Юрий Ивановичка «Киин куорат» сайт нөҥүө махталбытын тиэрдэбит. Түгэнинэн туһанан өссө биир иитиллээччитэ – Фаина Кузьменконы пьедестал үһүс үктэлигэр тахсыбытынан эҕэрдэлиибит.  Бу  – тренер чахчы оҕону кытта дьаныардаах, ситимнээх үлэтин түмүгэ. Уонна Юрий Иванович Арассыыйа спордун министиэристибэтигэр үлэтэ үрдүктүк сыаналаммытынан биһиги дьиэ кэргэн аатыттан эҕэрдэлиибит, махтанабыт. Эрчийэр оҕолоргун өссө да үрдүк чыпчааллар күүтэллэригэр эрэнэбит!

Олеся төрөппүттэриттэн төһө долгуйбуттарын туһунан ыйыталастыбыт:

Оо,  долгуйан бөҕө буоллаҕа дии. Оҕобутун эбээтэ арыаллаан барбыта. Онон барытын ыйытан, тэҥҥэ «ыалдьан», видеосибээс нөҥүө кэпсэтэ сылдьыбыппыт. Барбыт түүннэригэр түүл түһээн, «бастыыр эбит» диэн санаа эмиэ баара эрээри, бастаан итэҕэйбэтэхпит ээ. Хаартыска ыыппыттарыгар пьедесталга  кыыспыт турарын көрөн дьэ итэҕэйбиппит, үөрүү, киэн туттуу долгуна кууспута. Биһиги оҕобут үөлээннээхтэрин курдук буолбакка, доруобуйатынан хааччахтаах буолан, бу кыайыы хас да бүк үөрүүлээҕэ биллэр буоллаҕа дии!