Олег Петров – аан дойду ураты буочардаах дьонугар киирбит саха

Оттон илии баттааһынтан биһиги олохпут тутулуктааҕын эмиэ элбэхтик көрсөбүт. Кистэл буолбатах, илии баттааһыны үтүктэн ылан араас түбэлтэлэргэ, түгэннэргэ түбэһиэххэ эмиэ сөп.

Почерковед Олег Петров үлэтинэн Арассыыйа үгүс куораттарыгар ИДьМ иһинэн идэни үрдэтэр бэрт элбэх кууруска сылдьыбыт. Олортон биирдэстэринэн Волгоград куоракка эксперт-почерковед кууруһа буолар.

Оттон бу сэдэх дьоҕуругар өссө оҕо сааһыттан интэриэс үөскээбит эбит. Биллэн турар, маҥнай бииргэ улааппыт оҕолорунуун илии баттааһыны оҥорорго, суруйарга үөрэнэн саҕалаабыттар. Манна кинилэр саха алпаабытын кириллица буукубатын графическай көрүҥүн уларытан, кистэлэҥ бэлиэлэри оҥорбуттар, элбэхтик суруйсубуттар. Олег ол буукубалары туттан, тус бэйэтин туоһулуур бэлиэтин  оҥостубут. Уонна, эбии билии ылан, илиитин баттааһынын букатын ким да үтүктүбэт гына  тупсарбыт – араастаан эриллэҥнэтэн, муннуктуу, көнөтүк, уһаты-туора тутан. Ол кэмтэн буочара кытта уларыйбыт. Онтута улааппытын кэннэ идэтигэр туһалаабыт.

«Киин куорат» бүгүҥҥү Буочар күнүнэн эксперт-почерковед диэн сэдэх идэлээх старшай эксперт-криминалист, полиция майора Олег Афанасьевич Петровтуун Бүлүү куоратыттан сибээстэстэ. 

 – Мин 2015 сыллаахха үлэбинэн Волгоград куоракка почерковед куурсугар үөрэнэ тиийбиппэр, биир даҕаны эксперт  буочарбын сатаан үтүктүбэтэхтэрэ.

Хаартыскаҕа: Олег Петров илии баттааһына

Онтон ыла буочары наука быһыытынан чинчийэр профессор П.М. Кошмановтыын элбэхтэ алтыспыппыт. Профессор  бэйэтин   кинигэтигэр олус сэдэх илии баттааһыннаах уонна буочардаах дьону киллэрбитэ биллэр. Бэлиэтээн эттэхпинэ, хаҥас илиинэн суруйууну, тылы кэнниттэн суруйууну, ол иһигэр маннык ураты буочардаах дьону наука хараҕынан үөрэтэр, анаан-минээн көрдөөн булар исписэлиистэр бааллар. Уҥаттан хаҥас суруйуу диэн эмиэ баар. Ону түннүккэ сыһыаран баран көрдөххө, тиэкис тиэкиһинэн, киһи көҥүллүк ааҕар. Оннук наһаа ураты, дьикти интэриэһинэй дьон ортотугар киирсибит этим.

Илии баттааһыҥҥа болҕомто уурар билиҥҥи үйэҕэ ордук күүскэ наада. Илии баттааһыныҥ төһөнөн уустук да, оччонон харыстанар күүстээх. Элбэхтик буруллар, эргийэр, эриллэр, баттааһына кыччыыр, улаатар буоллаҕына, ким да кыайан үтүктүбэт. Бу барыта мэйии үлэтэ. Илии мэйииттэн сорудах ылан, оннук хамсыыр.

Онон, саха киһитин буочара наука хараҕынан уустук, сэдэх көрүҥнэргэ киирэ сылдьарын истэн киэн тутуннубут. Уонна дьоруойбут «Киин куорат» ааҕааччыларыгар махтал» диэн суруйан ыыппытын таһаарабыт.