Ол кэми ахтан, санаан...

Улуу Кыайыы 80 сылын көрсө Аҕа дойду Улуу сэриитин кэмигэр  1943 сыллаахха Суотту детдомун иитиллээччилэригэр, онно  иитиллибит, иитээччинэн үлэлээбит Петр Егорович  Заровняев 90 сааһын сырдык кэриэһигэр өрөспүүбүлүкэтээҕи тэрээһин бу дьыл кулун тутар 22 күнүгэр Суотту нэһилиэгин Хоноҕор бөһүөлэгэр буолан ааста. Тэрээһиҥҥэ Ем. Ярославскай аатынан Саха музейа “Спасённое детство” диэн ааттаах Саха сирин детдомнарын, ол иһигэр Суотту детдомун историятын,  П.Е. Заровняев олоҕун хаартыскаларынан, докумуоннарынан сырдатар быыстапканы онорон дьон кэрэхсэбилин, махталын ылла.

Быыстапка ааптара – музей пуондатын специалиһа Ю.В. Илларионова, дизайыннаан  оҥордо быыстапкалыыр салаа специалиһа М.С. Винокурова, быыстапка үлэтигэр көмөлөстө музей филиалын – Ем. Ярославскай музей Дьиэтин  салайааччы-методиһа – Д.С. Осипова. 
Куораттан тэрээһин кыттыылаахтара Бырабыыталыстыба автобазата (салайааччы Федоров Гаврил Юрьевич)  биэрбит микрооптуобуһунан өрө көтөҕүллэн айаннаан, иккис дойду оностубут, оҕо саастара ааспыт Хоноҕордорун көрөн үөрүүлэрэ үксээтэ, детдомнарын үтүө аатыгар сүгүрүйэн, кыамматтарын да умнан, ыалдьалларын аахсыбакка ытык дьоммут Үөһээ-Бүлүү, Амма курдук ыраах сирдэртэн айаннаан кэлэн оҕо саастара ааспыт миэстэлэрин ахтан, санаан аастылар, долгуйдулар. 

Тэрээһиммит  Петр Егорович Заровняев кыргыттара Лена Петровна Заровняева уонна Евдокия Петровна Бочкарева, Хоноҕор оскуолатын, музейын, кулуубун үлэһиттэрин салайыыларынан, «Сахатранснефтегаз» салайааччы Алексей Засимович Колодезников спонсордаан үрдүк таһымҥа ыытыллан, көлүөнэлэр ситимнэрин олохтоон, бары астынан,  сылаас сырдык сүүрээҥҥэ бигэнэн, олус бэркэ ааста. Бары кыттыыны ылбыт «Сэрии сылын оҕолоро», ыҥырыылаах ыалдьыттар өйдөбүнньүк бэлэхтэри ылан тарҕастылар. Хоноҕор оскуолатын оҕолоро, Суотту талааннаах дьонноро кыттыылаах, киһи дууһатын кылын таарыйар истиҥ ырыа ылланна, оҕо саастарын субу баардыы  санатар «Мин оҕо сааһым  сэрии сылларыгар» диэн ааттаан Петр Егорович Заровняев оҕо сааһын испиктээх оҥорон көрдөрбүттэрэ бар дьон сэҥээриитин ылла. 

Маны таһынан тэрийсибит дьон Ил Түмэн Бочуотунай грамотатынан, Биир ньыгыл Арассыыйа махтал суруктарынан, СӨ бэтэрээннэрин сэбиэтин салайааччыта (В.О. Иванов), СӨ Аҕаларын түмсүүтэ (А.И. Габышев), СӨ дьахталларын сэбиэтин (А.Е. Андреева) махтал суруктарын тутан үөрүүлэрэ үксээтэ.

Маннык үтүө тэрээһини тэрийсибит Саха музейын үлэһиттэригэр, мааны дьонноох-сэргэлээх, ытык Суотту олохтоохторугар, кэнчээри  ыччатыгар,  үөрэнээччилэригэр барҕа махталбытын тиэрдэбит. Баҕарабыт дойдубут дьоно дьоллоох, доруобай буолуҥ, үлэҕэ-үөрэххэ инники күөҥҥэ сылдьыҥ, куруутун маннык биир сомоҕо буолуҥ!

Петр Егорович Заровняев оҕолоро, сиэннэрэ.

Кулун тутар 22 күнэ, 2025 сыл