Октябрьскай уокурукка саҥа маршрут киириэх курдук

Олохтоох дьаһалта 2024 сыл түмүктэринэн уонна 2025 сыллааҕы былааннарынан отчуотун Октябрьскай уокурук олохтоохторугар баһылыгы солбуйааччы Антон Алексеенко оҥордо. Тэрээһиҥҥэ Ил Түмэн дьокутааттара Алексей Корнилов уонна Иван Луцкан кыттыыны ыллылар.
Норуот дьокутаата, Харах балыыһатын кылаабынай бырааһа Иван Луцкан куорат салалтатын кытта арыгы атыытын хааччахтааһын боппуруоһугар бииргэ үлэлэһэрин бэлиэтээтэ.
Отчуот кэнниттэн олохтоохтор ыйытыыларыгар хоруйдааһын буолла. Нэһилиэнньэ куорат инфраструктуратын сайыннарыыга, олох таһымын үрдэтиигэ сыһыаннаах ыйытыылары туруорда. Сылаас тохтобул ахсаанын элбэтэр, маршруттар үлэлэрин тупсарар, маассабай спорка уонна уокурукка оҕо аймахха куттала суох эйгэни тэрийэр наадата ыйылынна.
Суол-тырааныспар сулууспатын салайааччыта Эдуард Садовников бэлиэтээбитинэн, быйыл эбии 10 сылаас тохтобул тутуллуохтаах. Маны сэргэ эбии саҥа, өссө ордук комфортабельнай оптуобустар атыылаһыллан, Петр Алексеев уулуссатыгар саҥа маршрут эбэн, билиҥҥи 5 №-дээх маршрукка көмө буолуохтааҕа бэлиэтэннэ, диэн иһитиннэрэр Олохтоох дьаһалта пресс-сулууспата.