Оҕурсу сыанатын көрбүччэ...

Ол иһигэр, бэл, күһүөрү аҕай: "Ээ, чэ, мантан инньэ оҕуруот аһыгар “баайыллан бүтэбин”, “түксү! Сайыным үтүөтүн тэпилииссэҕэ, оҕуруокка төҥкөҥнөөбөппүн”, “эһиил үүнээйибин аҕыйатар эбиппин”, “манна ыыппыт харчыбар бэлэм үүммүтү элбэҕи атыылаһыахтааҕым” диэн саҥа аллайбыт кытта ким хайа иннинэ “уһуктан”, ыйыталаһан, бэлиэр тугу эрэ сакаастаһан эрэрэ – баар көстүү.  Оннук абылаҥнаах – үүнээйи, оҕуруот аһын олордуута!

Бэлэм уулаах-хаардаах, бэйэ уһаайбалаах, даачалаах буоллахха, бэйэ үүннэрэн сиирэ саныахха да астык. Мааһын табан дьаһанар, сирин сатаан оҥостор киһи барыһырар дьарыга. Ол эрээри ардыгар туох да үүммэккэ биитэр эмискэ хаһыҥнаан кэбиһэн, кураанаҕы кууһар, ночоокко тэбиллэр хомолто эмиэ баар буолар. Оннукка түгэҥҥэ арай: “Таһырдьа хамсанан-имсэнэн, бэйэтэ сэрээккэ буолан, доруобуйабын тупсардаҕым”,- диэн алы гыныахха сөп. Сорох дьон, фитнес-итнес дии-дии, харчы бөҕөнү куталларын санаа.

Оттон уонна оҕуруоккар уу кута, көрө-харайа сылдьан, күннээҕи түбүктэн, саппаҕырар санааттан аралдьыйарыҥ, туругуҥ уоскуйара сыттаҕа.   

Хаартыскаҕа Дьокуускай биир маҕаһыыныгар оҕурсу сыанатын көрүҥ! Биир статуска “Саюри” оҕурсута, маҕаһыыннаахтар ботуччу эппиттэрин суотугар, букатын да 500-тэн тахса солкуобайга “кэрэтийэ” сытара. Сайын сыана түһэрэ чуолкай, ол эрээри бэйэ киэнэ баара ордук. Онон, тулуйабыт: сайыммыт да кэлэрэ чугаһаата.