Оҕону оскуолаҕа хайдах бэлэмниибит?

Дьокуускай куорат Олохтоох дьаһалтатын Үөрэххэ управлениета бэйэтин ханаалыгар маныаха аналлаах олус интэриэһинэй ньымалары билиһиннэрэр:

Төттөрү расписание

Икки маҥнайгы нэдиэлэҕэ уруоктары таһынан «төттөрү дьайыылар» расписаниеларын оҥостуохха сөп. Манан оҕоҕо кэккэ сорудахтартан, үлэттэн «босхолонор» кыах бэриллэр.

Уруккуттан күлүү күнэ

Былырыыҥҥы учебниктары, тэтэрээттэри арыйталаан, күлүүлээх түгэннэри көрдөөҥ. Сыыһа суруйууттан, уруһуйтан, кинигэни марайдааһынтан күлүҥ. Маннык гынан оҕо үөрэхтэн, уруоктартан кутталын намыратыахха сөп.

Ураты малларынан аралдьытыы

Үөрэх бастакы ыйыгар биир-биир ураты канцелярскай маллары, үөрэх тээбиринин бэлэхтээҥ –  көстүбэт чэрэниилэлээх уруучука, күлүүлээх сотор, неон тастаах блокнот о.д.а. Манан "саҥа барыта, ол иһигэр үөрэх, кутталлаах буолбатах, саҥа – үөрүү" диэн өйдөбүлү чиҥэтиэххэ сөп.

20 мүнүүтэ быраабылата

Оҕону кытта, холобура, ахсаан садаачата 20 мүнүүтэ иһигэр сатаан суоттаммат буоллаҕына, тэтэрээти сабан кэбиһэрин курдук кэпсэтиҥ. Тэтэрээт сабылынна, ол аата көмө наада диэн өйдөнүллүөхтээх.

Бииргэ үөрэнэр оҕолортон куттаныы

Маннык эмиэ баар буолар. Оҕо куттанар, долгуйар буоллаҕына, бастакы күннэргэ уу чумпутук, дьон хараҕар быраҕыллыбакка сылдьарын көҥүллээҥ. Ханна да кыттыспакка, кимниин да кэпсэппэккэ, туораттан кэтээн көрөөччү оруолун талан. Онуоха, холобура, переменаҕа, наушниктаах сылдьыан, төлөпүөҥҥэ да олоруон сөп. Бу кэмҥэ оҕо тус кыраныыссатын оҥостор, саҥа усулуобуйаҕа бэйэтин миэстэтин көрдөнөр.

Арыый обургу оҕоҕо оскуоланы таһынан дьарык көмө буолуон сөп: секция, куруһуок, о.д.а. Холобур, үөрэҕин ыарырҕатар буоллаҕына, манна кини дьоҕурдаах, кыайар диэн өйдөбүл үөскүөхтээх.

Маҥнайгы кылааска киириэхтээх оҕо олус долгуйар түгэнигэр

Оскуола боруогун аан бастаан атыллыырыттан олус күүскэ догуйар кырачааны «оскуолаҕа наһаа үчүгэй, көрөөр-истээр, сөбүлүөҕүҥ» диэнинэн уоскута сатаамаҥ. Ол оннугар туох эрэ ураты, оонньуу хабааннаах ньымалары туттуҥ.

Дьаакыр артефакт

Оҕо сиэбигэр туох эмэ дьоҕус малы угуҥ – өрүс тааһа, оонньуур, о.д.а.. Уонна туохтан эрэ куттаннаххына бу малы ытыскар ылан күүскэ тут, оччоҕуна дьиэҥ күүһэ кэлэн эйиэхэ көмөлөһүөҕэ диигин.

«Көстүбэт ситим» браслет

Бэйэҕит уонна оҕоҕут бэгэччэҕэр тэҥ саптары баайыҥ. Бу саптар биһигини ситимнииллэр диэн быһаарыҥ: холобур, оскуолаҕа туохтан эрэ санаарҕаатаххына, бу сап «сылыйан кэлиэҕэ», оччоҕуна мин эйигин ыраахтан кууһуоҕум диигит.

Куттал холбуката

Хортуон хоруопканы ылыҥ. Оҕоҕутугар кумааҕы илиискэ туохтан куттанарын уруһуйдууругар көрдөһүҥ уонна ол уруһуйу кумалаан баран бу хоруопкаҕа угар, таһыттан скотчунан хам кэлгийэн кэбиһэр. Ол кэннэ хоруопканы бөххө таһааран быраҕыҥ. Бүттэ. Куттал суох.