Оҕону иитэр биэнсийэлээхтэр эбии төлөбүрү ылар бырааптаахтар

Биэнсийэҕэ эбии ааҕыынан Саха сиригэр 33 734 тыһыынча киһи туһаныан сөп, диэн Социальнай пуонда Саха сиринээҕи салаатын управляющайа Марина Герман иһитиннэрдэ.
«Эбии төлөбүр үлэлиир, үлэлээбэт даҕаны, саастарынан уонна инбэлиитинэн биэнсийэлээхтэргэ оҥоһуллуоҕа. Эбии төлөбүр кээмэйэ страховой биэнсийэ быһыллыбыт кээмэйин үс гыммыт бииригэр тэҥнэһэр. 2025 сылга бу төлөбүр биир оҕоҕо 2 969,23
солк. тэҥнэһэр, икки оҕоҕо - 5 938,47 солк., үс оҕоҕо 8 907,70 солк. Манна оройуон коэффициена эбиллэр. Биэнсийэҕэ эбии ааҕыы үстэн элбэх оҕоҕо оҥоһуллубат», – диэтэ Марина
Герман.

Иждивенецтарга төрөппүт уонна иитиэх оҕолор эрэ киирсибэттэр, манна биэнсийэлээх үлэлиир сааһа суох төрөппүттээх бииргэ төрөөбүт бырааттара, балыстара, сиэннэр эмиэ киирсэллэр. Бэлиэтээн эттэххэ, бу төлөбүр оҕо 18 сааһыгар диэри оҕо үөрэнэриттэн, үөрэммэтиттэн тутулуга суох ааҕыллар.
Сайабылыанньаны Госуслуги порталга тус кэбиниэт нөҥүө эбэтэр Социальнай пуонда чугастааҕы салаатыгар биэриэххэ сөп, диэн Ил Дархан уонна Бырабыыталыстыба пресс-сулууспата иһитиннэрэр.