Оҕолорбутун ситиһиигэ сирдиир киин

Дьокуускай куорат кытыы нэһилиэктэригэр үөрэх тэрилтэлэрэ оҕо аймахха эрэ буолбакка, бүтүн нэһилиэнньэ олоҕор тыын суолталаахтар. Ол курдук, Табаҕа орто оскуолатыгар «Точка роста» киин арыллыаҕыттан, чахчы, дьон-сэргэ талаһар, тардыһар сиригэр кубулуйда. Ол туһунан салайааччы Юлия Игоревна Дроздова сиһилии кэпсээтэ.

– Биһиги кииммит 2019 сыллаахха «Үөрэхтээһин» национальнай бырайыак иитинэн тэриллибитэ, онтон ыла уопсастыбаннай туона оруолун ситиһиилээхтик толорор. Манна оҕолор аныгы технологиялары таба туһанан, араас сатабылларга үөрэнэллэр, сыыппара эйгэтигэр сысталлар, бырайыактыыр, айар-тутар дьоҕурдара сайдар. Биир улахан ситиһиибитинэн чинчийэр үлэнэн дьаныардаахтык дьарыктанар үөрэнээччи ахсаана сыллата элбээн иһэрин ааттыыбыт, – диир Юлия Игоревна.

Манна даҕатан эттэххэ, кииҥҥэ дьоҕурдаах эрэ оҕолор дьарыктамматтар, «Точка роста» аана баҕалаахтарга барыларыгар аһаҕас.  Ону тэҥэ доруобуйаларыгар хааччахтаах үөрэнээччилэргэ сөптөөх усулуобуйа тэриллэр.

Табаҕатааҕы «Точка роста» киин аҕыйах сыл иһигэр кыайыыта-хотуута, ситиһиитэ сөҕүмэр элбэх. Педагогтары үөрэххэ ээл-дээл сыһыаннаһар оҕолор өрө тардыммыттара, кыһаллар буолбуттара ордук үөрдэр. 

– «Профессионалы» чемпионат «Ветеринария», «Управление БПЛА», «Спасательные работы», «Пожарная безопасность», «Большие данные» хайысхаларыгар кыайыылаах аатын ылбыппытын, бириистээх миэстэлэргэ тиксибиппитин киэн тутта кэпсиибит.  Биһиги оҕолорбут ОБЖ предметигэр, робототехникаҕа Бүтүн Арассыыйатааҕы үөрэнээччилэр олимпиадаларын муниципальнай түһүмэҕин призердара уонна кыайыылаахтара буолбуттара. 3Д моделирование уонна дизайн, тэхиньиичэскэй айымньы, хакатон күрэхтэригэр, араас научнай-практическай конференцияларга ситиһиилээхтик кыттабыт. Иллэрээ сыл биир үөрэнээччибит Бүтүн Арассыыйатааҕы «Шаг в будущее» НПК «Технические науки» секциятыгар үһүс миэстэни ылан кэлбитэ.

2023 сыллаахха киин иһинэн «Волонтеры IT» диэн сонун хайысха киирбит. Ол чэрчитинэн үөрэнээччилэр нэһилиэнньэҕэ – улахан дьоҥҥо, уһуйаан иитиллээччилэригэр – туһалаах үөрэхтэри тэрийэн, киэҥ сэҥээриини ылаллар эбит.

Киин баазатыгар доруобуйаларыгар хааччахтаах үөрэнээччилэргэ аналлаах «Легоконструирование», «Видеопроизводство», «Швейное дело», «Адаптивная физическая культура», «Парикмахерское искусство» компетенцияларга «Профессионалы» чемпионат муниципальнай түһүмэҕэ ыытыллыбыт.

«Родничок» уһуйааҥҥа «Росточек» киин арыллыбыт, «От «Росточка» – к «Точке роста» диэн бырайыак иитинэн оскуола уонна уһуйаан икки ардыларыгар ыкса ситим олохтоноро кэрэхсэбиллээх. Холобур, оскуола баазатыгар кырачааннарга тулалыыр эйгэни, үүнээйилэр, кыыллар олохторун үөрэтэр дьарыктар буолаллар.

Табаҕа оскуолата Дьокуускайдааҕы тыа хаһаайыстыбатын техникумун кытта ыкса үлэлэһэр, манна «Профессионалы» чемпионат «Ветеринария» компетенциятын муниципальнай түһүмэҕэ үрдүк таһымнаахтык ааһар.

Юлия Игоревна этэринэн, оскуолаҕа «Точка роста» киин арыллыаҕыттан оҕолор информатика предметигэр сөбүлээн уонна интэриэһиргээн үөрэнэр буолбуттар.

– Мин санаабар, эбии үөрэхтээһин киинэ оҕо айар дьоҕурун сайыннарар, ону ааһан улаатан эрэр эрдэҕэс саастаахтарга бэйэлэрин кыахтарыгар эрэли үөскэтэр. Оҕолор дьарыктаах буолан, үөрэххэ көрдөрүүлэрэ да тупсар. Кыайыы да, хотторуу да барыбытын сомоҕолуур, – диэн кэпсээнин түмүктүүр.

Хаартыскалар: ааптар түһэриитэ уонна ykt-tabaga.obr.sakha.gov.ru саайтан