Оҕолорбут саха тылын уонна литературатын саҥа учебнигынан үөрэтиэхтэрэ

Ол быһыытынан оскуола 1 кылаастан 11 кылааһыгар диэри үөрэнээччилэригэр, ону таһынан орто анал үөрэх кыһатын устудьуоннарыгар саҥа учебниктар оҥоһулла сылдьаллар.

Алын сүһүөх кылаастар (1–4) учебниктара быйыл экспертизаны ааһыаҕа уонна 2027 сылтан номнуо туттуллан саҕалыаҕа. Саха тылын билбэт оҕолорго эмиэ 2028-2030 сылларга анал учебниктар тахсыахтара.

Орто сүһүөх (5–9) үөрэнээччилэригэр икки ааптарыскай кэлэктиип үлэлээбит. Ол курдук, «Саха тыла» учебнигы – Наталия Сивцева салайааччылаах, «Төрөөбүт литератураны» Евдокия Поликарпова салайааччылаах бөлөхтөр оҥороллор. Кинилэри кытта ХИФУ, Тыл институтун исписэлиистэрэ уонна улуустар учууталлара үлэлэһэллэр.

Үрдүкү кылаастар учебниктарын (10–11) оҥорууну 2026 сылтан ылсыбыттар. Онон оскуолаларга 2028-2029 сылларга тахсара былааннанар.

Санатар буоллахха, саха тылын уонна литературатын саҥа учебниктарын оҥоруу үөрэх кыһаларыгар анал пособиелары оҥорор улахан бырайыак сорҕото. Ол эбэтэр үөрэхтээһин, доруобуйа харыстабыла, култуура, тыа хаһаайыстыбата, тырааныспар уонна бытовой хааччыйыы курдук алта эйгэни аныгы олох ирдэбилигэр сөп түбэһэр саҥа үөрэтэр-методическай пособиенан хааччыйар бырайыак иһинэн оҥоһуллаллар.

Бырабыыталыстыба бэрэссэдээтэлин солбуйааччы Сергей Местников бэлиэтээбитинэн, бу бырайыагы аҥаардас үөрэх саҥа пособиеларын оҥоруу курдук ылынар тутах, сүрүн соруга – аныгы олоххо тоҕоостоох тыл эйгэтин тэрийии уонна кинигэлэри федеральнай испииһэккэ киллэртэрии.

«Саамай сүрүнэ – оҕолор ийэ тылларын умсугуйан туран үөрэтиэхтээхтэр, ол тыллара олоҕу, култуураны, кэнэҕэски идэлэрин кытта ыкса ситимнээх буолуохтаах», – диэн бэлиэтиир Сергей Местников.

Ил Дархан Айсен Николаев уһуйааннарга уонна оскуолаларга этнокултуурунай эйгэни тэрийэр уонна оҕо төрөөбүт тылын туттар эйгэтин кэҥэтэр соругу туруорбута, диэн Ил Дархан уонна Бырабыыталыстыба пресс-сулууспата иһитиннэрэрэр.