Оҕолор сайыҥҥы кэмҥэ үлэлиир буоллахтарына

Үлэ биэрээччи оҕолорго аҕыйах чаастаах үлэ күнүн олохтуур эбээһинэстээх, оттон сокуоннай сааһын ситэ иликтэри түүннэри, өрөбүл уонна бырааһынньык күннэргэ, ону тэҥэ үлэни таһынан (сверхурочно) уонна вахта ньыматынан үлэҕэ тардар бобуллар. Бу туһунан РИА Сонуннара Госдуума дьокутаатыгар Дмитрий Свищевка сигэнэн иһитиннэрэр.

Оҕо 14 сааһыттан үөрэҕиттэн босхолонон баран чэпчэки үлэҕэ — төрөппүт суругунан сөбүлэҥинэн үлэ дуогабарын түһэрсиэн сөп. 15 саастан, үгэс курдук, маннык сөбүлэҥ ирдэммэт, оттон 16 саастан уопсай бириинсиптэринэн, 18 сааһын туола илик дьоҥҥо бобуулаах үлэлэртэн ураты, үлэлиир кыах баар.

Сокуоннай сааһын ситэ илик оҕо кылгатыллыбыт нэдиэлэ үлэлиир: 16 саастарыгар диэри — 24 чаастан элбэҕэ суох, 16-тан 18-гар диэри — 35 чаастан элбэҕэ суох. Ону таһынан ыарахан, кутталлаах уонна сир аннынааҕы үлэлэр, ону тэҥэ оонньуу биисинэһигэр, түүҥҥү кулууптарга, арыгы, табах эбэтэр наркотиктары кытта сибээстээх эйгэлэргэ үлэлээһин бобуллар.

Оҕолорго тургутар (испытательнай) болдьох олохтоммот. Үлэҕэ ылалларыгар үлэ биэрээччи суотугар медицинскэй көрүүнү хайаан да ааһаллар, салгыы 18 саастарын туолуохтарыгар диэри сыллата көрдөрөллөр. Үлэ дуогабарын оҥоруу булгуччулаах: дуогабара суох үлэ сокуоннайа суоҕунан ааҕыллар, оччоҕо оҕо быраабын көмүскүүр кыаллыбат.

Дьокутаат ону сэргэ официальнай үлэ биржаларын тэрийэр олохтоох дьаһалталартан ыйыталаһарга сүбэлээтэ — онно оҕолорго дуогабардаах уонна страховкалаах үлэ көстүөн сөп.