Оҕолор үксэ тохсус кылаас кэнниттэн бара сатыыллар

Быйыл Саха сирин оскуолаларын 23 000 оҕо бүтэрэр: 15 000 — тохсус кылааһы, 8 000 — уон биирис кылааһы. Бу туһунан өрөспүүбүлүкэ баһылыга «Россия 24» телеханаалга «Быһаччы кэпсэтии» биэриигэ кэпсээтэ. Айсен Николаев бэлиэтээбитинэн, выпускниктар орто анал үөрэххэ барар баҕалара улаатан иһэр.

«Ааспыт сылга орто анал үөрэххэ ортотунан биир миэстэҕэ 6,7 киһи этэ, оттон сорох колледжтарга куонкурус 20–30 киһиэхэ тиийбитэ. Маннык көрдөрүү Саха сиригэр эрэ буолбатах, дойду үрдүнэн тохсус кылаас кэнниттэн оҕолор аҥаардара колледжтарга бара сатыыр», — диэн регион баһылыга бэлиэтээтэ. Айсен Николаев этэринэн, маннык көстүү орто анал үөрэх тэрилтэлэрэ 2–3 сыл иһигэр аныгы үйэҕэ ирдэнэр, үчүгэй хамнастаах идэни биэрэр кыахтаахтарыттан тахсар.