Оҕолоох дьиэ кэргэҥҥэ өрөспүүбүлүкэттэн көрүллэр көмө

367 №-дээх 2019 с. олунньу 14 к. “Саха өрөспүүбүлүкэтигэр оҕо төрөөһүнүн өйөбүлүн туһунан” СӨ Баһылыгын дьаһалыгар олоҕуран, оҕолоох дьиэ кэргэттэргэ кэккэ көмөлөр бааллар.

Көмөнү туһаныы сүрүн усулуобуйата:

– Сайабылыанньа биэрээччи Арассыыйа гражданина, 3 сылтан кырата суох Саха сирин бастайааннай олохтооҕо буолуохтаах;

– Оҕо 2019 сыл тохсунньу 1 күнүн кэннэ төрөөбүт булуохтаах;

– Төлөбүрдэр бастайааннай олорор сирдэринэн оҥоһуллаллар. Прописката суох буоллаххытына, Саха сиригэр олороргутун суут нөҥүө быһаартараҕыт.

Бастакы оҕо күн сирин көрдөҕүнэ (иитэ ыллахха) төлөнөр: 35320 солк.

Төлөбүрү бастакы оҕотун төрөппүт (иитэ ылбыт) дьахтар эбэтэр эр киһи (соҕотох төрөппүт буоллаҕына) ылар.

Сайабылыанньаны кытта маннык докумуоннар ирдэнэллэр:

– РФ гражданинын пааспара;

– Оҕо төрөөбүтүн туһунан туоһу сурук;

– Родовой сертификат;

– Аҕа сайабылыанньа түһэрэр түгэнигэр, оҕо ийэтэ өлбүтүн эбэтэр бырааба быһыллыбытын туһунан ыспыраапка;

– Счет реквизиттэрэ.

Бу төлөбүр оҕо төрөөбүтүн кэннэ 12 ый ааһа илигинэ сайаапка түһэрдэххэ бэриллэр.

Иккис оҕо күн сирин көрдөҕүнэ (иитэ ыллахха) өрөспүүбүлүкэ Ийэ хапытаала: 139 985,10 солк.

Иккис оҕотун төрөппүт (иитэ ылбыт) дьахтар эбэтэр соҕотох төрөппүт буолар эр киһи ылар.

Сайабылыанньаны кытта маннык докумуоннар ирдэнэллэр:

– РФ гражданинын пааспара;

– Оҕо төрөөбүтүн туһунан туоһу сурук;

– Родовой сертификат.

Саха сирин Ийэ хапытаалын маннык хайысхаларга туһанар көҥүллэнэр:

– Дьиэни-уоту тупсарыыга;

– Оҕо үөрэнэригэр;

– Инбэлиит оҕону социализациялыырга табаар уонна өҥө атыылаһарга.

Сайабылыанньа хаһан баҕарар бэриллиэн сөп.

Үһүс уонна онтон кэлэр оҕоҕо ый аайы бэриллэр: 17660 солк.

Бу көмө дьиэ кэргэнтэн биир төрөппүккэ, уопсай дохуоттара ортону куоһарбат буоллаҕына, бэриллэр. Дохуот орто таһыма –  42119,30 солк.

Сайабылыанньаны кытта маннык докумуоннар ирдэнэллэр:

– РФ гражданинын пааспара, дьиэ кэргэн сокуоннай саастарын сиппит дьонун барыларын докумуоннара;

– Оҕолор төрөөбүттэрин туһунан туоһу суруктара;

– Родовой сертификат;

–Сайабылыанньа түһэриллиэн иннинээҕи 12 ый дохуотун туоһулуур докумуоннар;

– Счет реквизиттэрэ.

Бу төлөбүр оҕо төрөөбүт күнүттэн үс сааһыгар диэри ааҕыллар. Оҕо алта ыйын туола илигинэ сайабылыанньа бэриллиэхтээх. Оҕо алта ыйын кэнниттэн биэрдэххитинэ, сайабылыанньа киирбит кэмиттэн эрэ ааҕыллар.

2022 сыл – Ийэ буолуу сыла

СӨ Ил Дархана Айсен Николаев анал этиитигэр кэлэр сылы Ийэ буолуу сылынан биллэрдэ уонна элбэх оҕолонууну өйүүр миэрэлэр күүһүрэллэригэр сорук туруорда. Ол курдук, кэлэр 5 сыл устата Бырабыыталыстыба биэс уонна онтон элбэх оҕолоох ыаллар дьиэ-уот тупсарыыга ылыахтаах харчыларын төлүүр суоллары тобуларыгар соруйда.

Биэс уонна онтон элбэх оҕолоох ыалларга дьиэни-уоту тупсарыыга көрүллэр көмөнү ылар уочаракка билигин 1815 дьиэ кэргэн турар, быйыл бу көмөнөн 56 эрэ ыал туһаммыт. Маннык көмөнү 2012 сыллаахха киириэҕиттэн уопсайа 600 эрэ ыал ылбыт.

Маны таһынан, муниципалитеттарга биэс уонна онтон элбэх оҕолоох ыаллары баай-дуол нолуогуттан босхолуурга этии киллэрдэ. Приемнай дьиэ кэргэттэр хамнастарын икки төгүл үрдэтэргэ эттэ. Дьокуускайга кэлэр үс сыл устата Дьиэ кэргэҥҥэ уонна оҕолорго социальнай көмөнү оҥорор киин тутарга сорудахтаата.

Оҕолонууну, ийэ буолууну өйүүр уопсастыбаннай тэрилтэлэргэ бэриллэр граннары үбүлээһини икки төгүл үрдэтэргэ этии киллэрдэ.

Ийэлэр үөрэнэр, идэни баһылыыр кыахтарын үрдэтэргэ Дьарыктаах буолуу кииннэригэр ураты болҕомто ууруллуоҕун эрэннэрдэ. Ону тэҥэ дьахтар доруобуйатын тупсарар бырагыраамалары олоххо киллэрэргэ ыҥырда.