Оҕо уопсастыбаннай сэбиэтэ эппиэтинэһи сүгэртэн куттаммат

Куорат баһылыга Евгений Григорьев уонна Үөрэх управлениетын начаалынньыга Мария Петрова Дьокуускай куорат Оҕо уопсастыбаннай сэбиэтин кытта көрүстүлэр.

Көрсүһүү Сэбиэт бэрэссэдээтэлэ Роман Хайдуров ааспыт 2024 сыл уонна 2025 сыл бастакы кыбартаалыгар ыытыллыбыт үлэ отчуотуттан саҕаланна.

Маны сэргэ Сэбиэт чилиэннэрэ креативнай индустрияҕа үлэлиир дьон туһунан кэпсиир «Голос успеха», историяны билиһиннэрэр «Гордимся ими», интэриниэт алдьатыылаах өрүттэриттэн сэрэтэр «Онлайн страж» о.д.а. бырайыактарын билиһиннэрдилэр.

«Бу Сэбиэккэ баар оҕолор эппиэтинэһи бэйэлэрин илиилэригэр ылартан куттамматтар. Киһи төһөнөн элбэх эппиэтинэһи ылынар даҕаны, кини соччонон бэйэтин тулатын тупсарар кыаҕа үрдүүр», – диэтэ Евгений Григорьев.

Үөрэх управлениетын начаалынньыга Мария Петрова Сэбиэт ыытар үлэтэ куорат тыын суолталаах кыһалҕаларын таарыйарын бэлиэтээтэ.

Көрсүһүү түмүгэр Евгений Григорьев оҕолору Дьокуускай куоракка 2026 сылга тупсарыллыахтаах эбийиэктэр рейтиннээх куоластааһыннарыгар кыттан, тоҕоостоох эйгэни таларга көмөлөһөргө ыҥырда, диэн иһитиннэрэр Олохтоох дьаһалта пресс-сулууспата.