Оҕо төрөөтүн кытта хас да уһуйааҥҥа суруйтарарга сүбэлииллэр

Уһуйааҥҥа докумуону оҕо төрөөбүтүн кэннэ тута уонна хас да сөптөөх тэрилтэҕэ тэҥинэн туттарар ордук, оччоҕо оҕо уһуйааҥҥа киирэр сааһыгар кыах баар буолуо, — диэн ССТА-ҕа Госдуума дьокутаата Сергей Колунов кэпсээтэ.

«Арассыыйаҕа 2 ыйыттан 8 сааһыгар диэри хас биирдии оҕо уһуйааҥҥа миэстэ ылар бырааптаах. Сайабылыанньаны хаһан баҕарар биэриэххэ сөп, ол гынан баран төрөөбүтүн туһунан сибидиэтэлистибэни ылан баран төһөнөн эрдэ туттараҕын — соччонон үчүгэй. Уочарат сайабылыанньа бэриллибит күнүттэн оҥоһуллар, онон эрдэ суруйтарыы наадалаах уһуйааҥҥа киирэр кыаҕы улаатыннарар», — диэтэ дьокутаат.

Кини быһаарбытынан, сайабылыанньа биэриитигэр хас да уһуйааны талыахха сөп, үксүгэр үстэн биэскэ диэри көрөн ыйыахха наада.

«Тута итинник гынаргытыгар сүбэлиибин. Чугастааҕы тэрилтэҕэ миэстэ суох буоллаҕына, эһиги бириэмэҕитин халтайга ыыппаккыт уонна таларга кыах баар буолуо», — диэн Колунов бэлиэтээтэ.

Дьокутаат этэринэн, сайабылыанньаны Госуслуги уонна МФЦ нөҥүө биэриэххэ сөп. Ол туһугар, салгыы кини эппитинэн, төрөппүт пааспара, оҕо төрөөбүтүн туһунан сибидиэтэлистибэтэ уонна регистрациятын докумуона ирдэнэр.

«Дьиэ кэргэн уочараты таһынан эбэтэр бастакынан киирэргэ чэпчэтиилээх буоллаҕына, кинилэри эмиэ ыйыахха уонна докумуоннарынан бигэргэтиэххэ наада, — диэн Колунов эттэ. — Сайабылыанньа регистрацияламмытын кэннэ төрөппүттэргэ сайабылыанньа нүөмэрэ бэриллэр, ол нүөмэринэн Госуслуги эбэтэр МФЦ нөҥүө уочараты кэтээн көрүөххэ сөп. Уочараккыт кэлбитигэр биллэрии кэлиэ. Ол кэнниттэн икки нэдиэлэ кэриҥэ докумуоннары биэрэргэ уонна киллэриини оҥорорго бириэмэ баар буолуо».