Оҕо сайын 23 чаас кэннэ улахан дьоно суох таска тахсыа суохтаах

Былыр-былыргыттан  сайынын хараҥарбат, үрүҥ түүннээх Саха сиригэр оҕо-аймах хойукка диэри таһырдьа чэччийэр, көй салгыҥҥа дуоһуйа оонньуур, сынньанар үгэстээх. Ол гынан баран олохпут сайдан, ону кытта тилэх баттаһа бэрээдэк сатарыйан истэҕин аайы оннук сырыы сэрэхтэнэн, кутталланан иһэр. Буолан баран, куорат курдук дьалхааннаах сиргэ оҕо киэһэлик мэнээхтиирэ табыллыбат.

Оннук сылдьан ол-бу куһаҕаҥҥа түбэһэрэ үгүс. Бэрээдэги араҥаччылааччылар кэмиттэн кэмигэр анал эриэйдэлэри тэрийэллэр. Ол курдук,  бэс ыйын 4 күнүгэр сокуоннай саастарын туола илик оҕолор төрөппүт көрүүтэ-истиитэ суох сылдьалларын бэрэбиэркэлиир эриэйдэ ыытыллыбыт.  

Бэрэбиэркэ кэмигэр, ол эбэтэр, сыччах биир түүн устата, көрүүтэ-истиитэ суох сылдьар 58 эрдэҕэс оҕо тутуллубут. Кинилэртэн 4 оҕону уустук балаһыанньаҕа олорорун быһыытынан, реабилитициялыыр кииҥҥэ киллэрбиттэр.

Бэрэбиэркэ түмүгүнэн 26 боротокуол толоруллубут. Ол иһигэр 21 оҕо төрөппүтэ төрөппүт эбээһинэһин ситэ толорботторо быһаарыллыбыт. Бэл, оҕолорун арыгы иһэргэ күһэйбиттэр эбэтэр уопсастыбаннай миэстэҕэ итирик сылдьалларын көҥүллээбиттэр кытта бааллар эбит. Уоннааҕылар кыра күлүгээннээһин, суол быраабылатын тутуспатахтарын эбэтэр кыраадыстаах утаҕы иһэн баран сылдьыбыттарын иһин тутуллубуттар.

Оҕолору бэйэлэрин уонна кинилэр төрөппүттэрин кытта кэпсэтии, сэрэтэр, өйдөтөр үлэ ыытыллыбыт. Бу туһунан  куорат Полицията иһитиннэрбит.

Сокуону билбэт буолуу эппиэтинэстэн босхолообот

Манна даҕатан эттэххэ, 2009 сылтан саҕалаан, дойду бүттүүнүн үрдүнэн 18 сааһыгар диэри оҕолорго коменданскай чаас диэн баар буолбута. Коменданскай кэмҥэ төрөппүтэ, төрөппүтү солбуйар, кинилэр оннугар эппиэтинэһи сүгэр улахан дьоно суох сокуоннай сааһын туола илик оҕо уулуссаҕа, уопсастыбаннай миэстэлэргэ сылдьара көҥүллэммэт . Коменданскай чаас уопсай Быраабылалара 124 нүөмэрдээх Федеральнай сокуоҥҥа тирэҕирэр.

Өйдөө: сайыҥҥы каникул кэмигэр, бэс ыйын 1 күнүттэн саҕалаан атырдьах ыйын 31 күнүгэр диэри оҕо киэһэ 23 чаастан сарсыарда 6 чааска диэри уулуссаҕа уонна уопсастыбаннай миэстэлэргэ улахан киһи арыалдьыта суох соҕотоҕун сылдьыа суохтаах.

Онтон атын кэмҥэ ити болдьох киэһэ 22 чаастан сарсыарда 6 чааска диэри дьайар. Саха сиригэр итиниэхэ дьүөрэ 2010 сыл муус устар 14 күнүгэр тахсыбыт 822-З 529- IV №дээх СӨ сокуона баар.

 

Өскөтүн эрдэҕэс оҕо ити этиллэр кэмҥэ төрөппүтэ, опекуна суох сылдьар буоллаҕына, коменданскай чаас сокуонун кэспитинэн ааҕыллар. Төрөппүт административнай эппиэтинэскэ тардыллар. Оннук сааҥсыйалар  РФ КоАП 5.35 ыс. 1 ч. суруллаллар.

*2025 сыл атырдьах ыйынааҕы чахчынан, тустаах сокуоҥҥа уларытыы киирэн, оҕо түүҥҥү кэмҥэ улахан дьоно суох сылдьар түгэнигэр бастаан утаа сэрэтии эбэтэр 500 солкуобайтан саҕалаан, 2 тыһ. солк. диэри кээмэйдээх ыстыраап көрүллэр буолбут. Бу иннинэ ыстыраап 100 –500 солк. иһинэн халбаҥныыра.

Оҕо иккистээн тутулуннаҕына,  ыстараап суумата 4-5 тыһ. солк. диэри улаатар. Ону тэҥэ 5 сууккаҕа административнай хаайыыга, ол эбэтэр реабилитациялыыр кииҥҥэ киириэн сөп. Оттон хаһыстаан да түбэспит оҕону анал учуокка туруораллар.

Уопсастыбаннай миэстэҕэ туох киирэрий?

Санатабыт, холобур: уулусса, паарка, искибиэр, элбэх кыбартыыралаах дьиэлэр тиэргэннэрэ, уопсастыбаннай тырааныспар, интэриниэт-кафе, көмпүүтэрдиир кулууптар, саататар заведениелар, маҕаһыыннар, стадионнар, подъезтар.

Күндү төрөппүттэр, бука диэн, оҕолоргутун көрө-истэ сылдьыҥ. Бэйэлэрин эрэ соҕотохтуу хаалларымаҥ, улахан дьон арыалааһына суох уопастыстыбаннай миэстэҕэ тахсыбаттарын хааччыйыҥ.