Оҕо сайыҥҥы сынньалаҥын тэрийиигэ – ураты болҕомто

Үөрэх управлениетын начаалынньыга Мария Петрова иһитиннэрбитинэн, куорат таһынааҕы лааҕырдарга 1700 оҕо сынньанар усулуобуйата тэриллибит.

«2024 сылга 934 оҕо сынньаммыт эбит буоллаҕына,  быйыл куорат таһынааҕы лааҕырдарга 1700 оҕону ылар былааннаахпыт. Ити «Спутник» лааҕыр федеральнай бырагыраамаҕа кыттан, 4 саҥа куорпуһа үлэҕэ киирэн кыалынна.

Маны таһынан, үөрэх  тэрилтэлэрин базаларыгар арыллар күнүскү былаһааккаларга 6000-тан тахса оҕо хабыллыаҕа. Ону сэргэ, 12 тыһыынча оҕоҕо тиэргэн дьарыктара тэриллиэҕэ, Эрдэҕэс оҕо киинэ бэйэтин күүһүнэн «Таёжный герой», «Путь Росомахи» симиэнэлэри бэлэмниир, ону сэргэ Психолог-медик-социальнай арыаллааһынын киинэ уонна агро хайысхалаах оскуолалар  балаакканан уонна үлэ лааҕырдарын арыйыахтара», – диэтэ Мария Петрова.

Үөрэх управлениетын салайааччыта иһитиннэрбитинэн, сайыҥҥы кэмҥэ 2000-тан тахса оҕо үлэнэн хааччыллыахтаах.